स्विटजरल्यान्डयात ३–१ गोलं बुकाः साविक विजेता अर्जेन्टिना फिफा विश्वकपया सेमिफाइनलय् दुहांवंगु दु।

अमेरिकाया कान्सास सिटी स्टेडियमय् थौं सुथय् जूगु कासाय् स्विट्जरल्यान्डयात बुकाः अर्जेन्टिना विश्वकपया सेमिफाइनलय् दुहांवंगु खः। अर्जेन्टिनाया एलेक्सिस म्याक एलिस्टर, जुलियन अल्भारेल व लाउटारो मार्टिनेजं थःगु पुचःया निंतिं छगू छगू गोलया योगदान बियाः सेमिफाइनय् थ्यंकूगु खः।

धेंधेंबल्लाया १० गूगु मिनेटय् एलिस्टरं हेड गोल यानाः अर्जेन्टिनायात न्हापां न्ह्यने यंकूगु खः। उकिया लिपा कासाया ६७ गूगु मिनेटय् स्विटजरल्यान्डया डान एनडोयें गोल यानाः कासायात छगू छगू गोलया बराबरीइ थ्यंकल। धेंधेंबल्लाया ७२ गूगु मिनेटनिसें स्विट्जरल्यान्ड १० म्ह कासामिइ सिमित जुल। ब्रेल एम्बोलों निगूगु म्हासुगु कार्ड कयाः पिहांवने धुंकाः स्विट्जरल्यान्ड १० म्ह कासामि ज्वनाः म्हितूगु खः।

कासाया ९० मिनेटतक निगूलिं पुचःया ज्वलंज्वः गोल जूगुलिं कासा अतिरिक्त ईखय् थ्यन। धेंधेंबल्लाया ११२ गूगु मिनेटय् अल्भारेलं गोल यासें अर्जेन्टिनायात हाकनं न्ह्यने लाकल। उकिया लिपाया इन्जुरी टाइमय् मार्टिनेजं गोल यानाः अर्जेन्टिनायात सेमिफाइलनय् थ्यंकल। आः अर्जेन्टिनां फाइनल वनेगु निंतिं इङल्यान्डलिसे धेंधेंबल्ला याइगु जूगु दु।

Categorized in कासा