लोचनतारा तुलाधरया निगू व डा.रीना तुलाधर बनियाया खुगू सफू याना मुक्कं च्यागू सफू शनिवाः मंकाः कथं उलेज्या जूगु दु।

थुकथं उलेज्या जूगु च्यागू सफूतिइ लोचनतारा तुलाधरया निगु सफू ‘नेपालमा पालि भाषाको विकास’ व ‘सिमा मदुगु गुँ दुथ्याःगु खःसा डा. रीना तुलाधर बनियाया खुगु सफू ‘पालि भाषा सिकौं, रागाग्नी, अभिमन्यूया पुनर्जन्म, गणेद्यःया विलाप, मनोपुब्बङ्खमा धम्मा, भाग १ व मनोपुब्बङ्खमा धम्मा, भाग २ खः।

नेपालभाषा मिसा खलःया संस्थापक नायः सुवर्णकेशरी चित्रकारया मूपाहाँसुइ व्लुस्टार कम्पलेक्सया आरम्भ बैंक्वेट एण्ड इभेन्टसया सभाहलय् जूगु थुगु ज्याझ्वः मूपाहाँ सुवर्ण केशरी चित्रकारं देवाय् मत च्याकाः उलेज्या यानादीगु खः।ज्याझ्वलय् मूपाहाँ चित्रकार, अष्टमान सिं बनिया, प्रा.अमृतमान सिं बनिया, प्रा.मदनरत्न मानन्धर, डा. पुष्पराज राजकर्णिकार, कवयित्री प्रतिशरा सायमि, साहित्यकार रमेशकाजी स्थापित, डा. त्रिरत्न मानन्धरपिन्सं मंकाः कथं यानादीगु खः।

चम्पावतीया जेष्ठम्ह छय् नाप प्रोफेश्वर निर्मलमान तुलाधरं लसकुस न्वचू बिया न्ह्याःगु थुगु ज्याझ्वलय् उलेज्या जूगु सफूयात कयाः थीथी विद्धानपिन्सं समीक्षा नं यानादीगु खः।थुकथं समीक्षा यायगु झ्वलय् अभिमन्युया पुनर्जन्म सफूयात कयाः डा. पुष्पराज राजकर्णिकारं समीक्षा यानादीगु खःसा “नेपालमा पालि भाषाको विकास” सफूयात कयाः डा. त्रिरत्न मानन्धरं समीक्षा यानादीगु खः।अथेहे साहित्यकार रमेशकाजी स्थापितं सिमा मदुगु गुं सफूयात कयाः समीक्षा यानादीगु खः।

थुकथं हे प्रा. मदनरत्न मानन्धरं “पालि भाषा सिकौं” सफूयात कयाः समीक्षा यानादीगु खः। उगु ज्याझ्वलय् प्रा. अमृतमान सिं बनियां नेपालभाषा एकेदेमिया चान्सलर मल्ल के सुन्दर, कवयित्री प्रतिशरा सायमि व सफूया च्वमिपिं लोचनतारा तुलाधर, डा. रीना तुलाधर बनियापिन्सं नं थःथःगु नुगः खँ तयादीगु खः ।  नुगः खँ प्वंकादीपिन्सं मिसापिन्सं नं कुतः यानावन धाःसा थुकथंया विकास याना वनेफु धैगु क्यं धकाः धयादिल। नापं मिसापिंके नं विकासया पुसा दु, उकिं चा अर्थात् वातारण वा तिवः जक आवश्यक जुयाच्वंगुलिं चाया व्यवस्था यानाबिल धाःसा अःपुक हे समाजयात माःगु कथंया क्वातुगु ज्या याना वनेफु धकाः नं आशय प्वंकेगु याःगु दु।

थुकथं हे वक्तापिन्सं च्वमिपिन्सं यानादीगु अथक कुतःयात सम्मान यायगु धेगु हे वयकःपिन्सं च्वया पिदंगु सफू अध्ययन यायगु खः धकाः नं धयादीगु दु । नापं झी बौद्ध जुया नं बुद्धं ल्हाना विज्यागु भाषा मसःगु अवस्था दु। उकिं थौं पालि भाषाया विकास व पालि भाषा सयकेगु सफू तकं पिदंगु अवस्थाय् उगु सफू अध्ययन याना नं पालि भाषा सयका वनेमाःगु खँय् बः बियादीगु दु। बाखँ च्वमि मीना बज्राचार्यं न्ह्याकादीगु थुगु लसतां जाःगु ज्याझ्वःया अन्तय् मीना तुलाधरं सुभाय् न्वचु बियादीगु खःसा ज्याझ्वःय अन्तय् मूपाहां सुवर्ण केशरी चित्रकारं थःगु नुगः खँ तयाः सभा क्वचायकादीगु खः।

Categorized in राष्ट्रिय