न्यने बले अजू चायेफु । हेटौँडाया हरिकुञ्ज रोडय् च्वंगु पिएम सेन्टर सङ्गीत विभागय् छगू हे थासय् ३५० म्ह सिबें अप्वः सङ्गीतकःमि, कलाकःमि लिसें साहित्यकारया किपा खंकेफइ।

सङ्गीतया ख्यलय् न्यागूत्या दशकथुखे मदिक्क न्ह्याना च्वनादीम्ह पिएम सेन्टर सङ्गीत विभागया नायः लिसें वरिष्ठ सङ्गीतकार प्रमेन्द्र महर्जन साहित्य, कला व सङ्गीतय् योगदान याःपिं न्ह्यलुवाया हना लिसें थौंया पुस्ताया निंतिं हःपाः बिइगु आज्जु लिसें सङ्गीत, कलाकारिता लिसें साहित्यया ख्यलय् क्रियाशील व्यक्तित्वपिनिगु किपा छगू छगू यानाः सङ्कलन याना च्वनादीगु दु।

वरिष्ठ सङ्गीतकःमि गणेश ओस्ताद, नारायण गोपाल निसें थौं तक लोकं ह्वाना च्वंपिं न्हूपिं सङ्गीतकःमि नापनापं महाकवि लक्ष्मीप्रसाद देवकोटा निसें थौंया साहित्यकार तकया किपात वय्कलं फ्रेमिङ यानाः वया च्वनादीगु दु। वंगु खुदँ न्ह्यः निसें सङ्गीतकःमि, कलाकःमि लिसें साहित्यकारपिनिगु किपात सङ्कलन यायेगु यानागु धयादिसें वय्कलं थुगु अभियानयात छुं दिं लिपा नापं मदिक्कं न्ह्याका च्वनेगु धयादिल।

“जिं इतिहासय् विशिष्ट योगदान बियादीपिं न्ह्यलुवा स्रष्टा लिसें न्हूगु पुस्ताया स्रष्टातकया किपायात थी थी माध्यम पाखें मालाः सङ्कलन याना च्वनागु दु”, वय्कलं धयादिल, “थ्वहे झ्वलय् आःतक ३५० पा किपा सङ्कलन जुइधुंकूगु दु।”थःगु हे छेँय् दयेकातःगु पिएम सेन्टर सङ्गीत विभागया ज्याकुथिइ सङ्कलित किपात दूगु व आः भवन निर्माणया झ्वलय् दूगुलिं निर्माण क्वचायेवं उगु किपात थप व्यवस्थित यायेगु योजना दूगु वय्कलं धयादिल। 

Categorized in मनोरन्जन