थ्यंमथ्यं २४० म्ह यात्रुत सवार जूगु छगः इन्डोनेसियाली यात्रुवाहक जहाज जाभा सागरय्  सम्पर्कविहीन जूगु इन्डोनेसियाली खोज लिसें उद्धार अधिकारीपिंंसं आइतबाः जाकारी ब्यूगु दु।

दक्षिण कालीमन्तान प्रान्तया खोज लिसें उद्धार निकायया कथं उगु जहाज पूर्वी जाभा प्रान्तया सुराबाया पाखें दक्षिण कालीमन्तान प्रान्तया बान्जारमासिन पाखे यात्रा यानाच्वंगु झ्वलय् जहाजलिसे स्वापु त्वाः दःगु  खः। अधिकारीतय् कथं जहाजया लिपांगु ज्ञात अवस्थिति बान्जारमासिनया खोज लिसें उद्धार केन्द्रपाखें थ्यंमथ्यं ८० गू समुद्री माइल तापाक्क लानाच्वंगु खः।

जहाज सम्पर्कविहीन जुइ धुंकाः खोज लिसें उद्धारया निंतिं मेगु उद्धार जहाज घटनास्थलय् छ्वःगु दु। उद्धार टोलीं सम्पर्कविहीन जहाजया अवस्थिति सिइकेगु लिसें उकी सवार यात्रुतय्त मालेगु कुतः यानाच्वंगु धाःगु दु। प्रारम्भिक जानकारी कथं स्वापु त्वाःदले न्ह्यः उगु यात्रुवाहक जहाजं खराब मौसमयात फयाच्वंगु खः। समुद्री क्षेत्रय् प्रतिकूल मौसमया हुनिं जहाजया यात्रा प्रभावित जूगु जुइफइगु अधिकारीपिंसं धाःगु दु।

आःतक घटनाय् छुं नं कथंया मानवीय क्षति जूगु जानकारी मवःनिगु खोज लिसें उद्धार अधिकारीतय्सं धाःगु दु। अथे खःसां जहाजय् थ्यंमथयं २४० म्ह सवार दूगुलिं उद्धार टोलीं खोजी लिसें उद्धार अभियानयात तच्वयेकूगु दु। इन्डोनेसियाली अधिकारीतय्सं जहाजया अवस्थिति व यात्रुतय्गु अवस्थाबारे थप जानकारी कायेगु कुतः यानाच्वंगु दु।

Categorized in अन्तर्राष्ट्रिय