नवदुर्गा द्यःया प्याखं मंसिर १० गतेनिसें न्ह्याइगु
लहनान्युज | कछलाथ्व दशमी ११४७, मंसीर ३ बिहीवाः
ऐतिहासिक, सांस्कृतिक परम्परालिसे स्वानाच्वंगु नवदुर्गा द्यःया देवगण जात्रा थुगुसी थ्व हे वइगु मंसिर १० गतेनिसें न्ह्यायेत्यंगु दु ।
वंगु कात्तिक २७ गते नवदुर्गा द्यःया थाय् देवगणतय् छगू मुँज्या च्वनाः थुगुसी जात्रा जुइगु थाय् व मिति क्वःछिउगु खः । मुँज्यां क्वःछिउकथं वइगु मंसिर १० गते विहीवाः दकलय् न्हापां ख्वप नगरपालिका ५ स्थित तलेज द्यःयाथाय् खः प्याखंपाखें जात्रा शुरु जुइ ।
अनंलि छक्वलं पुस ३ गते येँया ग्वलय्, पुस ९९ गते मध्यपुर थिमिया दिगु त्वालय् पुस १० निसें १५ तक थिमिया हे थीथी थासय् जात्रा संचालन जुइ ।थुकथं हे पुस १७ निसें २१ गतेतक येँया तोखा, गोकर्ण, चपली लागाय् संचालन जुइगु जात्रा अनंलि हाकनं पुस ३० निसें माघ ६ गतेतक ख्वपया सुर्यमधि, दत्तात्रय, क्वाथन्डौं, गःछेँय् जात्रा जुइ ।
माघ १५ निसें १८ तक येँया उत्तर पूर्वी लागा सक्वय् जात्रा क्यनीगु जूगु दुसा माघ १९ व २० गते ख्वपया चाँगु नारायण लागाय् व माघ २८ व २९ य् ख्वपया हे महालक्ष्मी लागाय् जात्रा जुइ ।वयां लिपा फागुनय् ख्वपया हे थीथी थासय् जात्रा क्यनेधुंकाः काभ्रेया साँगा व नालाय् नं नवदुर्गा देवगणया जात्रा जुइ ।
फागुन ६ व ७ य् साँगा, फागुन २८ निसें ३० तक नालाय् जात्रा जुइगु समितिं न्ह्यथंगु दु ।जात्राया तालिकाकथं चैत १ व २ गते धौख्यलय् व चैत ३ गते काभ्रेया श्रीखण्डपुरय् जात्रा जुइ । दकलय् लिपा चैत २५ व २६ गते ख्वपया बालाखु लागाय् क्यनीगु जात्राया लिसें थुृगुसीया नवदुर्गा द्यःया जात्रा क्वचायेकीगु जूगु दु।
Categorized in राष्ट्रिय