श्रीगणेश व श्रीभैरवया द्यःछेँया जग स्वनं
लहनान्युज | कछलाथ्व त्रयोदशी ११४७, मंसीर ६ आईतवाः
येँ महानगरपालिकां जीवित देव श्रीगणेश व श्रीभैरवया द्यः छेँ निर्माण याइगु जूगु दु । बसन्तपुरया दबूया दक्षिणपाखे च्वंगु साविक नवआदर्श माध्यमिक विद्यालय दुगु थासय् श्रीगणेश व श्रीभैरवया द्यःछेँ निर्माण यायेत्यंगु खः ।
येँ महानगरपालिकाया कार्यवाहक प्रमुख सुनिता डंगोलं म्हिगः शनिवाः छगू ज्याझ्वःया दथुइ द्यः छेँ दनीगु थासय् जगपूजालिसें जग स्वनादीगु खः। उगु इलय् कार्यवाहक प्रमुख डंगोललिसें यन्ता व वन्ता (उत्तरपूर्व) कुनय् २४ वडाअध्यक्षलिसें हनुमानध्वाखा दरवार संरक्षण कार्यक्रम उपसमितिया संयोजक विनोदकुमार राजभण्डारी, वन्ता व इता (दक्षिणपूर्व) कुनय् २३ वडाअध्यक्षलिसें विधायन समितिया संयोजक मचाराजा महर्जन, यिता व यन्ता (उत्तर–पश्चिम) कुनय् १९ वडाअध्यक्षलिसें पूर्वाधार समितिया संयोजक राजेशकुमार श्रेष्ठ व इता व यिता (दक्षिण–पश्चिम) कुनय् २० वडाअध्यक्ष राजेन्द्र मानन्धरं पुजा यानाः जग स्वनादीगु खः।
जग स्वनेज्या लिपा नवानादिसें येँ महानगरपालिकाया कार्यवाहक प्रमुख सुनिता डंगोलं श्री गणेश व श्री भैरवया निंतिं बिस्कं द्यःछेँ निर्माणं जीवित सम्पदा संरक्षणय् महत्वपूर्ण योगदान जूवनी धयादिल । ताःहाकःगु कुतः व मेहनत लिपा ऐतिहासिक ज्या न्ह्याःगु दु। बहुपक्षीय सहभागितापाखें द्यःछेँ दनेगु ज्या सम्पन्न जुइ धासें द्यःछेँ निर्माणयात अपनत्व कयाः थःगु छेँ थें स्थानीयपाखें निगरानी दइगु अपेक्षा यानादिल ।
द्यःछेँ दनेत्यंगु थासय् च्वंगु नवआदर्श स्कुलयात २३ वडाया हे न्हूसाः त्वालय् च्वंगु बालसेवा माध्यमिक विद्यालयय् स्थानान्तरण याःगु खः ।
Categorized in राष्ट्रिय