थौंया अक्षय तृतीया नं लकडाउनं प्रभावित
बिकाश | बछलाथ्व तृतीया ११४०
थौं बछलाथ्व तृतीया, अक्षय तृतीया । मुक्कं हलिं हे कोरोना भाइरस (कोभिड १९) या संक्रमणया मारय् लानाच्वंबलय् थौंया अक्षय तृतीया नं थुकिं प्रभावित जूगु दु ।
कोरोना संक्रमण रोकथाम व नियन्त्रणया लागिं नेपाल सरकारं देयन्यंक लकडाउन जारी यानातःगु अवस्थाय् थुगुसीया अक्षय तृतीया नं प्रभावित जूगु खः ।
लकडाउनया अवस्थाय् दान धर्म आदिया ज्या यायेत नं मछिंगु अवस्था दुसा बजार बन्द जुयाच्वंगु अवस्थाय् साखः ति त्वनेगु वा त्वंकेगु ज्या नं उलि जुयाच्वंगु खनेमदु ।
न्हापा न्हापा थौंया दिनय् त्वाःत्वालय् साखःति दयेकाः लँजुवाःतयत नं त्वंकेगु याइगु खः ।
थौं दिनय् म्वःल्हुयाः नीसी यानाः विशेष कथं छ्वया सत्तु व साखः ति दान यायेगुया नापं नयेगु व त्वनेगु याइगु खः ।
थौंया दिनय् याइगु स्नान व दानयात विशेष महत्वलिसें स्वयेगु याः ।
थौं याइगु स्नान, दान, ध्यान र जप लिसेंया पुण्य कर्मया फल गबलें नाश मजुइगु खँ थीथी पुराणय् न्ह्यथनातःगु दु ।
वैशाख शुक्ल तृतीया अर्थात थौंया दिनय् भच्चा जक दान याःसा यक्व फल चूलाइगु व थुगु फल अक्षय अर्थात् गबलें नाश मजुइगु जूगुलिं थुगु दिनयात अक्षय तृतीया धाःगु मान्यता दु ।
छ्वया सत्तु व साखः तिं शरीर स्वस्थ्य दयेकातयेत ग्वाहालि याइगु लिसें ल्वय् लिसे ल्वाइगु प्रतिरोधात्मक क्षमता नं बल्लाकीगु धयातःगु दु ।
तांन्वइगु इलय् सिचुकीगु नसा ज्वलंया रुपं नं सत्तु नयेगु व साखः ति त्वनेगु याइ ।
थौंया दिनयात महाःद्यः पार्वतीया इहिपा जूगु दिनकथं नं कयातःगु दु । महाःद्यः पार्वतीया इहिपाः जूगु दिं जुयाः हे थौं सुयां इहिपा याःसा साइत स्वयेम्वाःगु मान्यता समाजय् दु ।
नारायण द्यःया खुगूगु अवतारया रुपं कयातःम्ह परशुरामया जन्म नं थौंया हे दिनय् जूगु विश्वास यानातःगु दु ।
अक्षय तृतीया दिंया स्वापू महाभारतलिसे नं दयाच्वंगु खनेदु ।
पाण्डवत १२झँ वनवास च्वंबलय् छन्हु दुर्वासा ऋषि उमिगु भिखाचाय् वल । द्रौपदीं दुर्वासा दुथे फुथे सत्कार यानाः नकल । द्रोपदीया सत्कार खनाः लयताःम्ह दुर्वासां द्रौपदीयात छगः अक्षय थल बिल ।
उगु हे इलय् दुर्वासां द्रौपदीयात अक्षय तृतीयाया महत्व बारे नं कनावन । थुगु दिनय् पृथ्वीइ सुनां नं विष्णयात विधि पूवंकाः पूजा याःसा वा चना, सत्तु, मौसमी, कापः व लः जायेकातःगु घः दान याःसा वयागु छेँया धुकू गबलें मप्वनीगु जनविश्वास दु ।
थ्व व हे बाखंया लिधंसाय् नं अक्षय तृतीया दिंया महत्व थहांवंगु खः ।
Categorized in राष्ट्रिय