थिमि नगरपालिकां न्हि ६ द्धः मनू तयेत निःशुल्क खानाया ब्यवस्था
लहनान्युज | बछलाथ्व नवमी ११४०,बैसाख २० सनिवाः
मध्यपुर थिमि नगरपालिकां न्हि ६ द्धः स्वया अप्वो मनू निःशुल्क खानाया ब्यवस्था याना वयाच्वंगु दु ।
उगु ज्याया लागि ६० म्ह स्वयंसेवकं स्वगु थासय् सेवा बियाच्वनागु दु धका जनप्रतिनिधि हरिदास प्रजापति लहनान्युजयात जानकारी बियादिगु दु ।
बहाखा बजारया एभरेस्ट पार्टी प्यालेस, सिद्धिकाली चोकया शुभ श्री व बोडेया सिन्टिटारय् याना स्वगु थासय् जा नकेगु ब्यवस्था याना वयाच्वंगु खः । सरकारं घोषणा याःगु लकडाउनया कारण न्हिथं ज्या याना नइपि मजदुरी तयेत समस्या जुगुलि अथे निःशुल्क जा नकेगु ब्यवस्था यानागु खः धका प्रजापति धयादिगु खः ।
वैशाख ११ गते निसे निरन्तर सेवा बिया वया च्वनागु धका समाजसेवी राजेश मानन्धरं जःला खःलाया नगरपालिकाया मजदुर तक वया नयेगु याना वयाच्वंगु दु धका धयादिगु दु । न्हि न्हि सुथय् ज बहनि व्यवस्थित कथं प्याकेट दयेका खाना इना च्वनागु धका मानन्धरं लहनान्युजयात जानकारी बियादिगु खः ।
निःशुल्क खानाया आर्थिक व्यवस्थापन स्वस्फूर्त दातापिन्स न ग्वाहालि याना वया च्वंगु थुुगु ज्याया लागि नगरपालिकां पेश्की बिया समन्वय याये फत धासा स्वयंसेवीपिन्त अझ अपूइगु धका मानन्धर धयादिगु खः ।
नयेगु लागि सामाजिक दुरी दयेका लाइनय् तया खाना वितरण याना वयाच्वंग् खः । मध्यपुर थिमि नगरपालिका वडा नं. ६ या वडाध्यक्ष ईन्द्रबहादुर प्रजापति, अभयन्द्र रंजित, दिनेश श्रेष्ठ, सीता विक लगायतपिन्स न सामुहिक संयोजन याना वयाच्वंगु खः ।
