स्वनिगलय् अत्यावश्यक प्रयोजनया निंतिं जक वयेबीगु
नृपेन्द्रलाल श्रेष्ठ | बछलागा चःह्रे ११४०,जेष्ठ ८ बिहिवाः
स्वनिगःया दुहांवयेगु फुक्क नाकाय् अत्यावश्यक प्रयोजनयात बाहेक मेगु दक्को सील याइगु जूगु दु ।
थौं गृह मन्त्रालयं स्वनिगःया स्थानीय तहयात निर्देशन बिउसे अत्यावश्यक ज्यायात बाहेक स्वनिगलय् वयेग वनेगु बन्द याये त्यःगु खः । गृह मन्त्री रामबहादुर थापाया अध्यक्षताय् उपत्यका मेयर फोरमया अध्यक्ष नाप येँ महानगरपालिकाया मेयर विद्यासुन्दर शाक्य नाप स्वनिगः मेयरपि नाप गृहसचिव, स्वनिगःया सुरक्षा प्रमुखपि नाप च्वंगु मुँज्यां अथे निर्णय याःगु खः ।
मन्त्रालयं स्वनिगलय् वइगु गाडीयात वइगु पनेत प्रस्थान जिल्लाया सुरक्षा निकाययात विशेष निगरानी यायेगु लागि निर्देशन बिःगु खः । स्वनिगलय् दुने यदि सुं नं मनू थन वयेमाःसा उम्ह मनूखं आरडीटी परीक्षण याःगु रिपोर्ट क्यनाः अनुमतिया निंतिं माग यायेफइगु खँ न्ह्य थना तःगु दु । नापं स्वनिगःया प्रवेश नाकाय् चेकजाँच व निगरानीइ थप कडाई यायेत धाःगु दु ।
स्वनिगलय् सुला सुला मनूत दुहां वयाच्वलि अज्यागु ज्या पनेगु निंतिं स्वनिगःया स्थानीय तहं स्थानीय प्रशासनयात कानूनी कारवाहीया प्रक्रिया न्ह्याकेत नं मन्त्रालयं निर्देशन बिःगु खः ।
स्वनिगलय् स्थानीय तह नं स्थानीय प्रशासन नाप समन्वय यानाः स्थानीय होटल, पार्टी प्यालेस, सामुदायिक भवनय् क्वारेन्टाइन दयेकेगु व्यवस्थापनया ज्या न्ह्याकेत निर्देशन बिःगु खः ।
वःगु जेठ १ गतेय् जुगु छलफलय् उपत्यकाया जनप्रतिनिधिपिं गृहमन्त्री रामबहादुर थापा वादल नाप उपत्यका नगरपालिका फोरमइा अध्यक्ष नाप येँ महानगरपालिकाया मेयर बिद्यासुन्दर शाक्य यल महानगरपालिका, ख्वप नगरपालिका, चन्द्रागिरी नगरपालिका, ताराकेश्वर नगरपालिका, टोखा नगरपालिका, शंखरापुर नगरपालिका, दक्षिणकाली नगरपालिका व सुर्य्िवनायक नगरपालिकाया मेयरपि सहभागी दुगु खः ।
