ख्वपय् नवदुर्गा द्यःया थाय् खःमेय् हल
शोभा श्रेष्ठ | गुंलाथ्व चौथी ११४०,साउन ९ शुक्रवाः
ख्वप नगरपालिका वडा नं ९ य् नवदुर्गा द्यःया थाय् म्हिगः खःमेय् हःगु दु । मोहनीया नवमी कुन्हु नवदुर्गा द्यःया थाय् उम्ह खःमेय् ब्बाका जात्रा याइगु परम्परा दु । उगु जात्राया लागि माःगुलि खःमेय् नवदुर्गा द्यःया थाय् चिइत हःगु दु ।
नेपालभाषा खःमेय् धइगु निख्खर हाकूम्ह मेय् खः । उम्ह हाकूम्ह मेय् यात ब्बाका याएगु जात्रायात स्थानीय नेपालभाषां खःमेय् ब्वाकेगु जात्रा धका धाइ ।
नवदुर्गा द्यःया थाय् खःमेय् द्यःया नकीं न्हुछेमाया बनमालां लसकुस यासे पूजा याना दुकाःगु खः । नकीं न्हुछेमायां आः वइगु मोहनीया नवमी तक उम्ह खःमेय् यात सुसाकुसा याना बिचाः याइ ।
जात्राया विधान कथं गठांमुगः चतुर्दशीया दिं नवदुर्गा देगलय् खःमेय् चिइगु नकिमय् खिपः चिइगु प्रचलन दुगु धका नवदुर्गा देवगणया नाइके बुद्धिकुमार बनमालां जानकारी बियादिगु दु । उगु खिपः चिइ धुका खःमेय् या लागि योग्यम्ह मेय् मालगिु ज्या जुइ धका धयादिगु खः ।
उगु कथं थुगु दँय् ख्वप नपा २ बालाखु च्वम्ह विजेन्द्र पुँलाछें उम्ह खःमेय् द्यःया थाय् छाःगु खः । उम्ह मनून येँया गोकर्ण खःमेय् ९० द्धः न्याना हयाःगु धका जानकारी बिःगु खः ।
विजेन्द्रं प्यदँ न्ह्यः हे खःमेय् छाय्गु इच्छा याःगु खः । तर, वयागु पाः न्यादँ लिपा जक वःगु खः ।
खःमेय् यात महिषासुर राक्षसया रुपय् कायेगु याः । उकि वडा मोहनीया नवमीया कुन्हु तुलजा भवानीं महिषासुरया वध याःगु माने याना उम्ह खःमेय् या जात्रा याना वयाच्वंगु खः । ख्वपया नपा ९ ब्रह्मायणी पीठय् उम्ह मेय् यात बलि बिइ ।
नवमीया दिं जात्रा याये माःगुलि खःमेय् निख्खर हाकू, ल्ह्वःम्ह व म्हय् गन न घाःपाः मजुम्ह जुइ माःगु प्रचलन दु ।
नवदुर्गा द्यया थाय् दुकाये धुका खःमेय् यात नकीं न तूचिकं बुका तया सासा भिंभिं नाप थ्व अय्ला त्वका तइ धका नवदुर्गा गणया नाइके बनमाला धयादिगु दु ।
वयाःगु कथं देवगणं पालंपाः खःमेय् यात घाँय्, नयेगु व्यवस्था याइ । थुगु दँय् तलेजूया रकमी खड्गीपि लिचिइवः ख्वपया श्याम नकःमि खःमेय् यात चिउगु खः ।
ख्वपय् खःमेय् हल
Categorized in राष्ट्रिय
