विदेश वनेत पीसीआरया नितिं प्रयोगशाला क्वजिल
लहानान्युज | चौलाथ्व द्धादशी ११४१,बैसाख ११ सनिवाः
स्वास्थ्य तथा जनसंख्या मन्त्रालयं विदेश वनिपिं मनूया पिसिआर परीक्षणया नितिं प्रयोगशालात क्वजिउगु दु ।
मन्त्रालयं विज्ञप्ती जारी यासें विदेश वनिपिं मनूया हकय् अज्याम्ह मनूया पीसीआर सरकारी प्रयोगशाला व अस्पतालय् आधारित जूगु ए वर्गया प्रयोगशालां जक याइगु न्ह्यथंगु दु ।
विदेश वनिम्हसिनं कोभिड परीक्षण याइगु फुक्क सरकारी अस्पतालं पीसीआर परीक्षण यायेफइ । मन्त्रालयं स्टार अस्पताल, मेडिसिटी, मनमोहन मेमोरियल, ह्याम्स हस्पिटल व भैरहवाया यूनिभर्सल कलेजपाखें पीसीआर परीक्षण यायेफइगु न्ह्यथंगु दु ।
पासपोर्ट वा भारत यात्रा याइपिनि हकय् म्हसिका ध्वाथुइगु भ्वँ परीक्षण याना जक नमुना संकलन यायेगु व्यवस्था यायेत मन्त्रालयं प्रयोगशालातयेत निर्देशन बिउगु दु । छुं दिं न्ह्यः अन्तर्राष्ट्रिय विमानस्थल लिक्कसंया सुरिया ल्याबं नक्कली पीसीआर रिपोर्ट दयेकुगु लुइधुंका सरकारं थुगु निर्णय याःगु खः ।
थ्वहे दथुइ छुं अस्पतालयात जक पीसीआर रिपोर्ट दयेकेगु नितिं सूचं जारी जूगु धासें निजी क्षेत्रया छुं स्वास्थ्य संस्थां धाःसा उकिया विरोध याःगु दु ।
