संवैधानिक परिषदया बैठक सुरु जुगु दु । उगु बैठक प्रधानमन्त्रीया सरकारी निवास बालुवाटारय् सुरु जुगु दु ।

वंगु मंसिर ३० गते लिपा परिषदया बैठक च्वने त्यंगु दु । थौंया बैठकय् सभामुख अग्निप्रसाद सापकोटा व प्रमुख प्रतिपक्ष दल नेपाली कांग्रेसया नेता शेरबहादुर देउवां ब्बति मकाः। सापकोटा थ्व स्वया न्ह्यः यागु बैठकय् न सहभागी मजुगु खः ।

राष्ट्रपति विद्यादेवी भण्डारीं वैशाख २१ गते मन्त्रिपरिषदया सिफारिसय् निक्वः तक संवैधानिक परिषद् (ज्या, कर्तव्य, अधिकार व कार्यविधि) सम्बन्धी न्हापागु संशोधन अध्यादेश–२०७८ जारी यागु दु । अध्यक्ष व स्वम्ह सदस्यपि अथे धइगु प्यम्ह दु। परिषदय् प्रधानमन्त्री अध्यक्ष नाप सभामुख, उपसभामुख, राष्ट्रिय सभाया अध्यक्ष, प्रधानन्यायाधीश व प्रमुख प्रतिपक्ष दलया नेता सदस्य दइगु संवैधानिक व्यवस्था दु । आः उपसभामुखया पद खाली जुयाच्वंगु दु ।

प्रधानन्यायाधीश व राष्ट्रिय सभाया अध्यक्ष बैठकय् सहभागी जूसा न्हुगु अध्यादेश कथं कोरम गाइ । तर प्रधानन्यायाधीश सहभागी मजूसा धाःसा कोरम गाइमखु ।

Categorized in राष्ट्रिय