बालमन्दिरया तःधंगु ल्याखय् मस्ततयेत संक्रमण पुष्टि
लहनान्यूज | कछलाथ्व चतुर्दशी ११४१,जेष्ठ ११ मंगलवाः
येँया निगू बालमन्दिरय् च्वनाच्वंपिं ४९म्ह मस्त कोरोना संक्रमण जूगु दु ।
नेपाल बाल संगठन अन्तर्गत नक्साल व सिफल बालमन्दिरय् च्वनाच्वंपिं ४९म्ह मस्तलिसें १०म्ह सुचुकुच याइपिन्त संक्रमण पुष्टि जूगु संगठनया मूछ्याञ्जे समिक बडालं जानकारी बियादिल । नेपालय् थुली तःधंगु ल्याखय् मस्तयेत कोरोना पुष्टि जूगु थ्व न्हापांगु खः ।
संक्रमित जूपिं ८लाः निसें १०दँया मस्त खःधाःसा निम्ह १८दँया खः । उपिंमध्ये अपांगता जूपिं तक लाःगु दु । सिफलय् ७०म्हेसित याःगु परीक्षणय् ३६म्हेसित संक्रमित पुष्टि जूगु खः । अथेहे नक्सालया बालगृहय् च्वंपिं २३म्ह मस्त संक्रमित पुष्टि जूगु खः ।
छुं मस्तय्गु रिपोर्ट धाःसा ल्यंहे दनिगु धाःगु दु । संक्रमितपिन्के मुसु वयेगु, ज्वरोलिसेंया लक्षण खनेदूगु खः । संक्रमित मस्तय्त किपूया आयुर्वेद केन्द्र यंकूगु दु ।
