अमेरिकां नेपालयात ‘कोभ्याक्स’ कार्यक्रम अन्तर्गत कोरोना खोप उपलब्ध यायेगु घोषणा यागु दु।

अमेरिकी राष्ट्रपतिया कार्यालयं बिहीवाः ‘बिश्वब्यापी खोप रणनीति’ घोषणा यासे न्हापागु चरणय् २ करोड ५० लाख डोज खोप थीथी देशय् बितरण यायेगु धका उल्लेख यागु दु, उकि मध्ये १ करोड ९० लाख डोज खोप कोभ्याक्स कार्यक्रम अन्तर्गत नेपाल नाप मेमेगु देशय् न बिइत्यंगु खः।

कोभ्याक्सपाखे वितरण यायेत्यंगु खोपमध्ये करिव ६० लाख ल्याटिन अमेरिका व क्यारेबियन देशय् वनिइ। ल्यदनिइगु ७० लाख दक्षिण व दक्षिणपूर्वी एसिया नाप ५० लाख अफ्रिकाय् वनिइगु धका घोषणा यागु दु। एशियाया लागि छुटे यागु ७० लाख डोज खोप नेपाल नाप भारत, बंगलादेश, पाकिस्तान, श्रीलंका, अफगानिस्तान, मालदिभ्स, मलेसिया, फिलिपिन्स, भियतनाम, इन्डोनेसिया, थाइल्याण्ड, लाओस, पपुन्यूगिनी, ताइवान व एशिया प्यासिफिक आइल्याण्डय् बिइगु घोषणा यागु खः। कोभ्याक्स कार्यक्रमपाखे नेपालं २० प्रतिशत खोप काये दइगु अपेक्षा दु । आःतक २ लाख ८४ हजार स्वया अप्वो डोज खोप वये धुकुगु दु।

कोभ्याक्सपाखे वितरण याना ल्यःदनिइगु ६० लाख डोज खोप क्यानडा, मेक्सिको, भारत व दक्षिण कोरिया नाप कोरोना महामारी जुयाच्वंगु देशय् बिइगु धका राष्ट्रपति बाइडेनं धागु दु। अमेरिकां जुन महिना तक ८ करोड डोज कोरोना खोप विश्न्यक ग्वाहालि यायेगु, उकि मध्ये न्हापागु चरणय् बिइगु साढे २ करोडया खोप वितरण यायेगु योजना अमेरिकी राष्ट्रपति जो बोइडेनं सार्वजनिक यागु खः।

Categorized in अन्तर्राष्ट्रिय