शिक्षा विज्ञान व प्रविधि मन्त्री कृष्णगोपाल श्रेष्ठं नेवाः पत्रकार राष्ट्रिय दबूया कोरोना द्रुत प्रतिकार्य कोषया नितिं छगू लाख ग्वाहालि यागु दु।

मन्त्री श्रेष्ठं थौं मन्त्री निवासय् कोषया संयोजक सुरेन्द्रभक्त श्रेष्ठयात उगु ग्वाहालि लःल्हानादिगु खः । कोरोना महामारीया इलय् पत्रकारतय्त ग्वाहालि यायेग कथं पत्रकार दबू कोरोना द्रुत प्रतिकार्य पुचः निस्वंगु खः।

थथे ग्वहालि लः ल्हासें मन्त्री श्रेष्ठले पत्रकारिता पाखें समुदायया अधिकार, भाषा, संस्कृतिया उत्थानय् पत्रकार दबू नं याना वयाच्वंग ज्यायात कयाः च्वछानादिगु खः । अथे हे वयकलं येँ महानगरपालिकां नेपालभाषाया शिक्षा बिइगु ज्या सकारात्मक जुगु धासें भाषाभाषी व जातजाति च्वनाच्वंगु लागाय् स्थानीय भाषा शिक्षा बिइ माःगु पक्षय् थः दुगु खँ कनादिगु खः।

पत्रकार दबूया नायः सुरजबीर बज्राचार्य पत्रकार दबू नेपाली सञ्चार क्षेत्रय् समावेशी यायेमाःगु अभियानयात कयाः न्ह्याका च्वनाःगु जानकारी बियादिगु खः।

अथेहे पत्रकार दबूया दांभरी लिसें कोरोना द्रुत प्रतिकार्य पुचःया संयोजक सुरेन्द्रभक्त श्रेष्ठ निषेधाज्ञा इलय् यक्वः सञ्चारकर्मीत बेरोजगार जुगु, चिधंगु स्वरोजगार मिडिया संकटय् लाःगुलिं थथे संकटय् लाःपिन्त सञ्चारकर्मीपिन्त ग्वाहालिं यायेगु नितिं आः तक कोषय् थ्यमथ्यं ३ लाख तका मुंगु जानकारी बियादिगु खः।

Categorized in राष्ट्रिय