बिहीबाः निसें आन्तरिक हवाई सेवा न्ह्याइगु
बछलागा पञ्चमी ११४१, असार १५ मंगलबाः
निला निसें बन्द जूगु आन्तरिक हवाई सेवा बिहीबाः निसें सञ्चालनय् वयेत्यंगु दु ।
नेपाल नागरिक उड्डयन प्राधिकरणं सीमित क्षमताय् हवाई उडान सञ्चालन यायेत अनुमति बिइधुंका हवाई सेवा हाकनं सञ्चालनय् वयेत्यंगु खः । कोरोना महामारी अप्वयावनेधुका सरकारं वंगु वैशाख २० गते निसें आन्तरिक हवाई उडान सेवा लिछ्यागु खः ।
कोरोना संक्रमितया ल्याः म्हो जुयावनेधुंका स्वनिगःलय् निषेधाज्ञा छुं छ्वासुकुगु नापं सरकारं आन्तरिक हवाई उडान नं सुचारु यायेत अनुमति बिउगु खः । बिहीबाः निसें सेवा सञ्चालन यायेगु जुइधुंका हवाई सेवा प्रदायकतयेसं टिकट बुकिङ न्ह्यागु न्ह्यथंगु दु । हवाई उडानय् नं क्षमताया बागू प्रतिशतया ल्याःखय् जक यात्रु तयेत प्राधिकरणं अनुमति बिउगु दु ।
विमान सञ्चालकतयेसं धाःसा पूर्ण क्षमताय् सेवा सञ्चालन मयाःबलय् न्हिं खर्च फयेत समस्या जुइगु धयावःगु दु ।
