थौं गथांमुगः चःह्रे
लहानान्युज | दिल्लागा त्रयोदशी ११४१,साउन २२ शुक्रवाः
थौं गथांमुगः चःह्रे । नेपाल संवत् तिथि कथं प्रत्येक दँया दिलागा चःह्रेकुन्हु अर्थात थौंकन्हु थुगु चखः हनेगु चलन दु ।
थौं दोबाटोय् न्ह्यायेपंकट्ठी प्रयोग याना दयेकातःगु गथांमुगःया प्रतिक दयेकाः सनिलय् विसर्जन याइ । विशेषतः थौं कुन्हु सिनाज्या ब्यंकेगु याः । सिथि नखः निसें औपचारिक शुरु जूगु सिनाज्यायात सांस्कृतिक रुपं थौं तकया दुने क्वचायेकाः सिनाज्या ब्यंकेमाःगु खः ।
सिनाज्या ब्यंकेगुया अर्थ वर्षा बालीया खेती किसानी ज्या क्वचायेकाः थःथःगु छेँय् सुचुपिचु यायेगु धइगु जुइ । थौंकुन्हु हे सिनाज्या ब्यंकेगु चलन कथं सुथ न्हापं छेँ सुचुपिचु यानाः बं थिला, छेँजःपिं म्वः ल्हूयाः शुद्ध जुइगु याः ।
थौं हे म्वः ल्हूयाः लिक्कच्वंम्ह महाद्यःया जल हयाः छेँछेँय् छ्वाकेगु याः । नेवाः समुदाय दुने थौंकुन्हु लैचा पायेगु धकाः ल्हाःतय् मेहेन्दी तयेगु निसें नःया र्अंगु तकं न्ह्याइ । मस्तय्गु सवालय् दयेकातःगु कतामरीयात थौं हे दोबाटोय् यंकाः वायेयंकी ।
भूतप्रेत अले दानवया आत्मां थीमफयेम्ह धइगु विश्वासं अज्यागु ज्या याइगु खः । येँय् घण्टाकर्णया प्रतिकया रुपं आजु द्यः दयेकाः बौ तयेगु याइसा ख्वपय् घण्टाकर्णया प्रतिक न्ह्यायेपं कट्ठीया भूत दयेकाः त्वाःत्वालय्च्वंपिन्सं च्याकेगु याइ । थुखय् नेवाः पत्रकार राष्ट्रिय दबू ख्वप कचां गथांमुगः चखःया विषयस अन्तक्र्रिया याःगु दु ।
संस्कृतिविद् व पत्रकारदथुइ याःगु अन्तरक्रियाय् प्रा. डा. पुरुषोत्तम लोचन श्रेष्ठं गथांमुगः व घण्टाकर्ण छगु हे प्रकृया जूगु दाबी यानादीगु खः । लिपांगु ईलय् गथांमुगः व घण्टाकर्ण विस्कं संस्कृति जूगु खँ बय्बय् जुयाच्वंगु ईलय् वय्कलं न्हूगु खँ कनादीगु खः ।
नेवाः समुदायदुनेया किसानतनाप सम्बन्धित थ्व संस्कृतिइ भूत व द्यःया कथं स्वीकार यानातःम्ह गथांमुगःयात महाद्यः व कुमारनाप तकं स्वानाः न्वचू तयादिल । आः तक लूगु थीथी अभिलेखं पुष्टि याःकथं गथांमुगः व घण्टाकर्णनिसें द्यः व भूतदथुइया खँ आम प्रवृत्तिं निर्धारित याइगु न धयादिल ।
ज्याझ्वलय् संस्कृति अनुसन्धानकर्ता ई. राजेन्द्र तूबन्जा श्रेष्ठ ब्वति दुथ्याःगु खः ।
Categorized in राष्ट्रिय
