२०७८ मङ्सिर २१, मंगलबार

महाःद्यःयात यःगु श्रावण महिनाया महिमा

प्रेममान डंगोल | दिल्लागा द्धादशी ११४१,साउन २२ शुक्रवाः

दँय्दसं श्रावण महिनाय् महाःद्यःयात अतिकं हनेगु याइ । श्रावण महिना जःछि महाःद्यःया देगलय् मेला हे जुयाच्वनी । अथे जुयाः थ्व मेलायात श्रावणी मेला नं धाय्गु याः । महाःद्यःयात हनेगु बार सोमबाः, उकीसनं महाःद्यःयात अतिकं यःगु महिना श्रावण । श्रावणया सोमबाः पतिकं महाःद्यःयात अतिकं श्रद्धाभाव तयाः भक्तजनतय्सं हनेगु याइ । श्रावण महिना जःछि महाःद्यःयाथाय् भक्तजनतय्गु भीड जुयाच्वनी । ब्याहा मयाःपिं वा ब्याहा याय्धुंकूपिं मिसातय्सं थःथःगु इच्छा पूवंकेत श्रावणया सोमबाः पतिकं व्रत च्वनाः थःथःगु लागाय् दुगु महाःद्यःया पूजा याइ । म्हासूगु वा ह्याउँगु पर्सि सिनाः वाउँगु चुरा न्ह्यानाः पुचः पुचः जानाः मिसात महाःद्यःयाथाय् वनी ।
 
नेवाःतय्सं पाहांचः¥हे, सिलाचः¥हे, बालाचः¥हे व थीथी नखःचखलय् थःगु हे पहलं महाःद्यःयात हनावःगु दु । श्रावण महिनाय् लाइगु गुंपुन्हि नखःबलय् महाःद्यःयात हनेगु झ्वलय् नेवाःतय्सं सिलु तीर्थय् तकं वनेगु यानाच्वंगु दु । नेवाः संस्कृतिइ परम्परानिसें हालावःगु सिलु म्ये अले लिपा दय्कूगु सिलु नेवाः संकिपा नं उतिकं लोकंह्वाः । नेवाःतय्सं थःगु हे पहलं हनावःगु थीथी महाःद्यःतमध्ये श्री पशुपति महाःद्यः, दुम्जा महाःद्यः, कविलास महाःद्यः व नासःद्यः, क्वन्ति महाःद्यः, गोकर्ण महाःद्यः, ख्वपया सिपारे महाःद्यः व दत्तात्रय, कुलेश्वर महाःद्यः, मखंया महेन्द्रेश्वर महाःद्यः, मरुया सन्तानेश्वर महाःद्यः व यलया सन्तानेश्वर महाःद्यःयाथाय् श्रावण महिना जःछि सोमबाः पतिकं तःधंगु मेला जुइ । 
 
श्रावण महिनाया संल्हूकुन्हु श्रावण संक्रान्ती धकाः शैवतय्सं हनेगु याइ । नेवाःतय्सं गथांमुगःकुन्हु बौ वाय्यंकीगु व भूतप्रेत पिशाचं दुःख मबीमा धकाः छ्वालि च्याकाः दुवातय् वाय् यंके थें खय् ब्रम्हूतय्सं श्रावण संक्रान्तिकुन्हु चासुकै मवय्मा, भूतप्रेत व थीथी ल्वचं दुःख मबीमा, सकसिया उसाँय् न्ह्याबलें बांलानाच्वनेमा धकाः कण्डारक नांयाम्ह राक्षसया पूजा यानाः कल्चासिँ च्याकाः, पूर्व पश्चिम, उत्तर व दक्षिण प्यंगू दिशाय् मि वां छ्वय्गु परम्परा दु । थुकुन्हु श्रावण संक्रान्ती नखः हनेगु धकाः साःसाःगु नसा ज्वरे यानाः म्ह्याय्मस्त व थःथितिपिन्त ब्वनाः नकेगु याइ ।
 
श्रावण महिनायात महाःद्यःयात यःगु महिनाया रुपय् कयातःगुलिं फुसा लच्छियंक, मफुसा श्रावण महिनाया सोमबाः पतिकं जूसां व्रत च्वनाः महाःद्यःया पूजा यात धाःसा सन्तान मदुपिनि सन्तान दइगु, निर्धनतय् धन दइगु व अविद्यां ग्रस्त जुयाच्वंपिन्त विद्या प्राप्त जुइगु अले विद्वानया रुपय् लोकंह्वाइगु मान्यता दु । श्रावण महिनाया सोमबाःया व्रत याय्वं धर्म नं लाइगु खँ धर्म शास्नय् थुकथं न्ह्यथनातःगु दु ः
 
सोमवारे व्रतं कार्य श्रावणे वै यथाविधिं ।
शक्तेनो पोषणं कार्यमथवा निशि भोजनम् ।।
अपुत्रो लभते पुत्रान्निर्धनो धनवान् भवेत् ।
अविद्यो लभते विद्यामिति धर्मविदो विदुः ।।
 
श्रावण महिना जःछि मेला जुइगु नेपाः व भारतय् दुगु प्रशिद्धगु महाःद्यःत थथे दु, – श्री पशुपति महाःद्यः व थीथी थासय् दुपिं ६४ शिवलिङ्ग, भारतया ज्योतिर्लिङ्गत, वैद्यनाथ धाम, काशी विश्वनाथ, रामेश्वरम्, सोमनाथ, मल्लिकार्जुन, महाकाल, केदारनाथ, भीमशंकर, ऋम्केश्वर नागेश, घुश्मेश्वर व ओमकार तीर्थय् अर्थात महाःद्यःया थ्व १२ ज्योतिर्लिङ्ग पीठय् मेलाया रुपय् लच्छियंक तःधंगु मेला जुइसा बोलबमया नामं महाःद्यःयात गंगाजल छाय्बलय् अश्वमेघ यज्ञ याःगुति ग्यनीगु, व उगु हे कथंया फल दइगु मान्यता दु ।
 
श्रावण महिनाय् महाःद्यःया नापं पार्वतीया नं आराधना याइ । श्रावणया अर्थ न्यनेगु जूवनी । अथेजुयाः थ्व इलय् थीथी थासय् व त्वाःत्वाःपतिकं नं चतुर्मास पुराण कनेगु याइ । थ्व पुराण न्यनेमाः, पुराण न्यनेबलय् ज्ञान दइ । थ्व हे कारणं श्रावणयात अतिकं उत्तम महिनाया रुपय् कयातःगु दु । श्रावण महिनाय संल्हूनिसें वर्षा ऋतु नं शुरु जुइ, सुद्र्यः नं दक्षिणायनय् वनी । अथे जुयाः थ्व महिनाय् श्रीधर नारायण, कान्तिमती, लक्ष्मी, गभास्ति सुर्यया पूजा याइ । विशेष यानाः थ्व इलय् लक्ष्मीया पूजा याय्बलय् लक्ष्मी प्रशन्न जुयाः महाःद्यःयात याःगु उपासना सफल जुइ धकाः शास्त्रय् वर्णन यानातःगु दु । महाःद्यःया पूजा व साधना याय्त विशेष यानाः सोमबाः व श्रावण महिना अले सिलाचः¥हेयात अतिकं उत्तम माने यानातःगु दु । थ्व पर्वय् महाःद्यः व पार्वतीया उपासनां सुख, शान्ती दइगु जीवन आनन्दं न्ह्याःवनीगु अले तिपु जीवन सुखमय जुयाः भाःतया आयू बृद्धि जुइ धयागु मान्यता दु ।
 
श्रावण महिनाय् लच्छियंक महाःद्यःयात हनेगु झ्वलय् महाःद्यःयात अभिषेक याय्त बोलबम धाधां या.गु यात्रा नं श्रावणी मेलाया नामं चर्चित जुयाच्वंगु दु । न्यागू ज्ञानेन्द्रीय, न्यागू कर्मेन्द्रीय व अन्तस्करणनिसें हे शुद्ध पवित्र जुयाः याइगु बोलबम यात्रा भारतया बैद्यनाथ धामं शुरु जूगु खः । नेपाःया तराईवासीतय्सं थ्व बोलबम स्वनिगलय् दतहःगु खः । दकले न्हापां बोलबम काँवरिया संघं न्ह्याकूगु बोलबम यात्राय् १३म्ह जक भक्तजनतय्सं ब्वति कयाः सुन्दरीखुसिं जल क्वबिया हयाः पशुपति महाःद्यःयात छाःगु खः । छुं आः वयाः द्वलंद्वः भक्तजनतय्सं ब्वति काय्गु यानाहल । गेरु वस्त पुनाः, ब्वहलय् खःमू थें पंया काँवर कुबियाः निगः चायागु कलशय् जल जाय्क तयाः नांगा तुतिं न्यासि वनाः, अपसं च्वनाः बोलबम नारा थ्वय्काः सुन्दरीजलनिसें वयाः पशुपति महाःद्यःयात जल छाय् हइ ।  गुरुपुन्हिनिसें गुंपुन्हितक मेला जुइगु बोलम निगू कथंया दु । छगू डांक बम व मेगु साधारण बम ।
 
डांक बम धाःपिन्सं सुन्दरीजल खुसिया मुहानं जल हय्धुंकाः गनं नं दिकेमज्यू । उपिं न्ह्यकुन्हु हे म्वःल्हुयाः शुद्ध जूगु जुइमाः । लँय् सुं नापं खँ ल्हाय्गु, लः त्वनेगु, नय्गु, व खिच्व नं फाय्गु याय्मज्यू । साधारण बोलबमतय्सं धाःसा लँय् खँ ल्हाय्गु, शौचालय वनेगु, नय्पित्याःसा जल घडा तजाःगु शुद्ध थासय् तयाः नय् त्वनेगु याइ । बोलबातय्त नकेत लँय दथुइ थाय्थासय् व्यवस्था यानातःगु दइ । थथे बोलबम यात्रा वनीपिं भक्तजनतय्गु जाति, भाषा व मेगु छुं नं कथंया भेदभाव दइमखु । बोलबमय् विधिवंक ब्वति काःसा चिनी ल्वय्, रक्तचाप, जण्डिस, कब्जियत थेंज्याःगु ल्वय् नं लनीगु विश्वास यानातःगु दु।