निर्वाचन आयोगं माधव नेपाल नेतृत्वं प्रस्तावित यागु पार्टी नेकपा एकीकृत समाजवादी व महन्थ ठाकुर नेतृत्व यागु लोकतान्त्रिक समाजवादी पार्टीया दर्ता प्रक्रिया थौं क्वछिइगु तयारी जुगु दु।

आयोगं निगु दलया नेतापिन्त सनाखतया लागि थौं सःतूगु दु। सामान्यता सनाखत लिपा आयोगं दल दर्ताया प्रमाणपत्र बिइगु याइ।सनाखतया लागि थौं बुधबाः सुथय् ११ः३० बजेनिसे २ बजे तकया ई बिउगु खः। दल दर्ताया निवेदनय् सुयागु नां दु, उपि थः हे उपस्थित जुया सनाखत यायेमाः धका निर्वाचन आयोगया प्रवक्ता राजकुमार श्रेष्ठं धागु दु।

राजनीतिक दल सम्बन्धी अध्यादेश कथं न्हुगु दल दर्ताया लागि संघीय संसद वा केन्द्रीय सदस्यपिनिगु २० प्रतिशत अलग जुगु जुइमाः। एमालेय् २०३ म्ह केन्द्रीय सदस्यपि मध्ये माधव नेपालयाके नेकपा एकीकृत समाजवादी दर्ताया लागि ५७ म्ह केन्द्रीय सदस्यपिनिगु नां आयोगय् बुझे यागु खः।

अथेहे ठाकुरं ३१ म्ह कार्यकारिणी सदस्यपिनिगु नां आयोगय् बुझे यागु खः।

Categorized in राष्ट्रिय