मदुम्ह शशीलाल दाईयात लुमंकाबलय्
सुगत रत्न सिन्दुराकार | ञंलाथ्व पंचमी ११४१, भाद्र २६ सनिवाः
मनूयात मदय्कं मगाःगु खँ धइगु हे स्वतन्त्रता खः । स्वतन्त्रता विना मनूm मनू जुयाः म्वाय् फयाच्वनी मखु । थ्व हे खँयात वाःचाय्काः आपालं सचेतवर्गतय्सं राजनीति यानाः मनूयात माःगु आधारभूत स्वतन्त्रता बीगु ज्याय् थःत पानाः संघर्ष याना वयाच्वंगु दुृ । उकिं हरेक राजनीतिक व्यत्तित्वयाके स्वतन्त्रताया गन्ध दयाच्वनीगु खः । थःगु जीवनया लक्ष्य धइगु हे जनतायात स्वतन्त्रता बीगु व जनताया सकतांकथंया आधारभूत पक्षयात सहज यायगु कथं कया नं वयाच्वंगु दु।
जनहितया भावनायात कःघानाः गुलिखय् मनूत स्थानीय स्तरनिसें हे राजनीतिइ थःगु पलाः तया वयाच्वंगु दु । गुगु ज्या देश व जनताया नितिं अपारिहार्य ज्या नं खः । थुकथं देश व जनतायात हित यायगु मनुसुवाः ज्वनाः तःदँ न्ह्यःनिसें थःत राजनीतिइ होमय् यानादीम्ह छम्ह क्रियाशील, मृदुभाषी व शालिन व्यत्तित्व कामपा वडा नं १९ या नायः शशीलाल श्रेष्ठ नं खः । थः युवा अवस्थांनिसें नेपाली कांग्रेसया प्रजातान्त्रिक विचार धारायात कःघानाः सकललिसे समन्वय यानाः राजनीतिइ होमय् जुयादीम्ह खः वय्कः ।
येँ महानगरपालिका वडा नं १९ य् छकः वडा सदस्य व स्वक्वः वडा नायः जुयाः देशय् लोकतन्त्र स्थापना याय्या नितिं क्रियाशील व जनताया भावनाकथं आधारभूत ज्या यानादीगु दु । सुशासनयात तसकं हे माया मतिना यानादीम्ह वय्कः लोकतन्त्रयात थःगु जीवनया अमूल्य आधार ताय्का च्वनादीम्ह व्यत्तित्व खः । येँ महानगरपालिका १९ वडाया नायः शशीलाल श्रेष्ठ खाली राजनीतिइ जक थःत समर्पित याना वयाच्वनादीम्ह पक्का नं मखु । थःगु वडाया विकासया ज्याखँय् तसकं अभिरुची तयाः सामाजिक ज्याखँय् नं थःत समर्पित यानादीम्ह शालिन व्यत्तित्वया धनी वय्कः खः । गुकिया फलस्वरुप वय्कः स्थानीय निकायलय् सकस्यां सकारात्मकरुपं म्हस्यूम्ह व्यत्तित्व जुइत तकं ताःलानादीगु दु । अझ वडाया हरेक ज्याखँय् अग्रसर जुयाः
न्ह्यानाच्वनादीगुलिं नं स्थानीय रुपं लोकंव्हाःम्ह नेता वा समाजसेवीया रुपय् तकं वय्कःयात काय्गु याना वयाच्वंगु दु ।
वडाया पदाधिकारी जुयाच्वंगु इलय्् जक मखु, वडाय् ताः ईतक जनप्रतिनिधिविहिन जुयाच्वंगु इलय् तकं नं वय्कलं जनताया भावनाया कदर यानाः क्वातुक ससाजसेवा यानादीगु दु । अझ धाय्गु खःसा स्थानीयं वडाध्यक्ष थें हे वय्कःयात भाःपियाः मान सम्मान बियाः त्वालय् माःमाःकथंया ज्याखँय् समन्वयकारी भूमिका म्हितकेगु ज्या तकं नं याकादीगु खः । थुगु ज्यां वय्कः लिपांगु इलय् तकं स्थानीय निकायलय् वडाध्यक्ष जुइत ताःलाःगु खः ।
जनताया भावनायात गुकथं त्याकेमाः धइगु पूर्वज्ञानय् निपूर्णम्ह कथं नं वय्कःयात काय्गु यानातःगु दुसा वय्कःया उपस्थितिं हे वडाया छिंगु मछिंगु आपालं ज्याखँत समाधन जुयावंगु दु । वडावासीत न्ह्याग्गु हे उमेर समूहया जुसां नं वय्कलं सकलयात समाहित यानाः ज्याखँय् न्ह्यःने न्ह्याका यंकेफुगु हे वय्कःया बिलक्षण प्रतिभा खः । गुगु प्रतिभा म्ह्वः हे जक मनूतय्के दयाच्वनी । शशी दाई धालकि तसकं हे लोकंव्हाःम्ह व्यत्तित्वया रुपय् स्थापित जुयाच्वंम्ह जूगु हुनिं नं गुगुं नं कथंया समस्यायात समाधान याना वनेत विशेष रुपं वय्कःया भूमिका दयाच्वनीगु खः । वडा विकासया सवालय् नं वय्कःया सक्रियताय् आपालं ज्याखँत जुयावयाच्वंगु दु । गुगु सक्रियता समाजसेवाया रुपं स्थापित जुयाच्वंगु दु । छखे राजनीतिक रुपं थःत स्थापित यानादीम्ह व मेखे वडावासीया भावनायात बांलाक वाःचाय्काः वडावासीया सेवा यानादीम्ह वय्कःया व्यत्तित्व जूगुलिं राजनीति व वडावासीया सेवा गुकथं यानाः न्ह्याःवनेमाः धकाः गुलिखय् खँत वय्कःपाखें प्रेरणा काय्फइगु आधार दयाच्वंगु दु ।
वय्कःया राजनीतिपाखेया खँ ल्हाय्बलय् नेपाली कांग्रेस १९ वडा इकाइ कार्यंसमितिया सभापति तकं जुयाादीगु दु । थुगु ल्याखं वय्कलं नेपाली कांग्रेसया उत्थानया नितिं १९ वडापाखें गुकथं योगदान याय्माःगु खः, वयकःया नेतृत्वय् आन्दोलनय् सहभागि जुइगु खँनिसें कयाः मेमेगु सांगठनिक ज्याखँय् तकं योगदान बियादीगु दु । गुगु ज्या राजनीतिक पक्षया नितिं मदय्कं मगा?गु आधारभूत ज्या खः । देशयात बल्लाकेत राजनीतिया तःधंगु भूमिका दयाच्वंगु खँ सुयातं धाय्माली मखु । विना राजनीति देश प्रगतिया त्वाथलय् थहां वने फइमखु धकाः आपालं राजनीतिक ख्यलय् न्ह्यज्यानाच्वंपिंन्सं वाःचाय्काच्वंगु दु । उकिं लोकतन्त्रप्रति झ्ुकाव दुपिं युवा व्यत्तित्वयात राजनीतिइ साला हय्गुनिसें कयाः उमित माःमाःकथं सक्षम यायगु ज्याय् नं वय्कलं प्रत्यक्ष अप्रत्यक्षरुपं भूमिका म्हितादीगु दु । गुकिया फलस्वरुप १९ वडाया नेकाया कार्यकर्तापिं थीथी वडाया नेकाया कार्यकतातनाप समन्वय यानाः न्ह्यज्यानाच्वंगु दु । थ्वहे
राजनीतिया छगू तःधंगु आधार नं जुयाच्वंगु दु । गुकिया शुरुवात शशीलाल श्रेष्ठनिसें कयाः नेकाया लोकप्रिय नेता नविन्द्रराज जोशीलगायतपिन्सं याःगु दु ।
थःत वडा नायःया रुपय् स्थापित यानाः ज्या याय्गु धइगु कम साहसया ज्या धाःसा पक्का नं मखु । थीथी मनूतय् असन्तोष मनयात शान्त यानाः वनेमाःगु जिम्मेवारी नं वडा नायःया ब्वहलय् वयाच्वनी । गुगु ज्या तसकं हे जटिल अले विवेकशील ज्या खः । थुकथंया वडाया असहज ज्यायात तकं सहज यानाः मनूया मन त्याका? सन्तुष्ट यानादीगु आपालं दसि नं वय्कःया जीवनकालय् दु । थीथी कथंया ज्याखँय् न्ह्यःने वयाच्वनीगु विवेकं हे लोकप्रियतायात कःघाना च्वनीगु खः । उकिं थौं वय्कः लोकप्रिय जुइफुगुया आधार धइगु मछिंगु ज्यायात विवेकं त्याका पूर्णता बीत ताःलानादीगुलिं खः ।
थौं झीगु न्ह्यःने नेकाया छम्ह सक्रिय व्यत्तित्व एवं १९ वडावासीया नुगःया सः शशीलाल श्रेष्ठ मदय्धुंकल । वय्कःया भौतिक शरिर झीगु न्ह्यःने मदुसां तबि वय्कःया भावना झीके दु । वय्कःया योगदानयात आः झीसं सदां लुमंका तय्माःगु दु । नापनापं वय्कःया भावनायात कदर यानाः वडा विकासया ज्याय् थीथी वडाय् राजनीतिइ थःत पानादीपिन्सं शिक्षा वा प्रेरणा काय्माःगु तकं खनेदु । अथेहे वय्कः मदुसां तबि वय्कःया भावना कथंया ज्याखँत १९ वडा दुने जुया वनाच्वन धाःसा वय्कःयात झीसं धात्थेंगु श्रद्धाञ्जली प्वंकागु सावित जू वनी।
