छत्रपाटी निःशुल्क चिकित्सालय अस्पतालया न्हूगु भवनया शिलान्यास जूगु दु । थौं येँ महानगर प्रमुख विद्यासुन्दर शाक्यं अस्पतालया न्हूगु भवन शिलान्यास यानादिल । भवन शिलान्यासया झ्वलय् महानगर प्रमुख शाक्यलिसें उपप्रमुख हरिप्रभा खड्गी श्रेष्ठ, १७ वडाया वडाध्यक्ष नविन मानन्धर व अस्पतालया नायः डा. मनोजमान श्रेष्ठं मंकाः कथं भूमि पुजन यानादीगु खः । उगु इलय् नवासें प्रमुख शाक्यं इलय् हे स्तरीय ज्या यायेत इनाप यासें धेबाया चिन्ता मकायेत धयादिल । क्षेत्रपाटीइ १० आना १ दाम जग्गा करीब ३५ करोड तकाया लागतय् अस्पतालया न्हूगु भवन दयेकेत्यंगु खः । ज्याझ्वलय् महानगर उपप्रमुख खड्गी श्रेष्ठं दक्वं अधिकारमध्ये नं नागरिकयात स्वास्थ्य सम्बन्धी अधिकारया प्रत्याभूति याकेत थःपिन्सं कुतः यानाच्वनागु धयादिल । वडा १७ या वडाध्यक्ष मानन्धरं ०७२ सालया भुखाय्, ०७५ य् डेंगु व आः विश्व महामारी जुयाच्वंगु कोभिड संक्रमणया इलय् चिकित्सालयं स्वास्थ्योपचारय् ब्यूगु योगदानयात च्वछानादिल ।

अस्पतालया नायः डा. मनोजमान श्रेष्ठं मेगु वालंनिसें न्हि सच्छि सिलिण्डर अक्सिजन उत्पादन क्षमताया प्लान्ट स्थापना यायेत्यनागु जानकारी बियादिल । अस्पताल निर्माणया न्हापांगु चरणय् १२ करोड तकाया लागतय् भूमिगत १ तलालिसें ७ तलाया भवनया स्ट्रक्चर तयार याइ । उकिया नितिं येँ महानगरं न्हापा हे २ करोड ५० लाख तका उपलब्ध याकेधुंकूगु दु ।

आः थप २ करोड ५० लाख तकालिसें महानगरं ५ करोड तका बीगु धाःगु दु । थ्व बाहेक अस्पतालया आन्तरिक आय व दातापिनिगुपाखें चूलाइगु ग्वहालि धेबा छ्यलेगु नायः श्रेष्ठं धयादिल । अस्पतालय् आः २४ घौ हे इमर्जेन्सी, शल्यक्रिया, जनरल वार्ड, आइसीयू, भेन्टिलेटर, प्याथोलोजी ल्याबलिसें दक्वं कथंया सामान्य व विशेषज्ञ स्वास्थ्य सेवा न्ह्यानाच्वंगु दु । कोभिड संक्रमणया निगूगु लहरया इलय् महानगरं थुगु अस्पतालयात महानगरया कोभिड विशेष अस्पतालया रुपं न्ह्याकूगु खः । २०१७ सालय् राजनीतिक अस्थिरताया इलय् जूगु झडपय् घाःपाः जूपिन्त वासः यायेगुलिइ थुगु चिकित्सालयया तःधंगु भूमिका दु ।

Categorized in राष्ट्रिय