एमसीसी
लहनान्युज | ञंलाथ्व षष्ठी ११४१, भाद्र २७ आईतवाः
सरकारं हाकनं संसद अधिवेशन आह्वान याःगु दु । भदौ २३ गतेया नितिं मन्त्रीपरिषद्या सिफारीसय् राष्ट्रपति विद्यादेवी भण्डारीं संसद अधिवेशन सःतादीगु दु । थ्वयां न्ह्यः २३ न्ह्यः तिनि थ्व हे सरकारं संसद अधिवेशन क्वचाय्कूगु खः । संसद अधिवेशन क्वचाय्कूगु २३ न्हुं हे हाकनं संसद अधिवेशन आह्वान जूबलय् थनथाय् थुगु पालय् च्वनेत्यंगु संसद अधिवेशनयात मेगु हे मिखां स्वयाः विश्लेषण न्ह्याःगु दु । सरकारया थुगु पलाःयात कयाः थीथी न्ह्यसः नं दंगु दु ।
दकले न्हापांगु न्ह्यसः धइगु ला यदि २३ न्हु दुने हे संसद वैठक च्वने हे माःगु खःसा २३ न्हु न्ह्यः सरकारं हथासं छाय् संसद अधिवेशन अन्त्य याःगु खः ? यदि संसद अधिवेशन अन्त्य याय्माःगु हे खःसा आः हाकनं २३ न्हु दुने हे तुरन्त छाय् सःतेमाल ? थ्वयां न्ह्यःया सरकारं निक्वःतक संसद विघटन यात । निक्वःगु खुसीया संसद विघटन विरुद्ध सर्वोच्च अदालतय् लाःगु मुद्दाय् ला सर्वोच्चं शेरबहादुर देउवायात प्रधानमन्त्री नियुक्त या धकाः परमादेश हे जारी यानाबिल । तर न्हापांगु खुसी संसद विघटन याय् दइमखु धकाः जक आदेश ब्यूगु खः, सरकार ओली नेतृत्वय् हे न्ह्यानाच्वन ।
उगु इलय् नेपाली काँग्रेसया सांसद गगन थापां धाःगु छता खँ थन लुमंकेबहःजू । ओलीयात संसद खनाः तं दु, अथेजुयाः थःगु संसद विघटनया पलाः सहि खः धकाः सावित याय्त ओलीं संसदयात विजनेश हे मब्यूगु धकाः गaगन थापां संसदय् हे नवाःगु खः । आःया परिस्थितीइ नं नेपाली काँग्रेसया हे सभापति शेरबहादुर देउवाया नेतृत्वय् सरकार दयाच्वंगु इलय् नं संसदयात विजनेश बीफयाच्वंगु मदु । आः संसदयात बीत विजनेश द हे मदुगु धाय्गु खःसा नं थीथी विधयेकया चाङ अथें हे दु । वर्तमान सरकारं नं संसद अधिवेशन क्वचाय्काः अध्यादेशमार्फत ज्या न्ह्याकेत स्वःगु खनेदत । धाय्बलय् वर्तमान सरकारयात नं संसद म्वाःगु हे खतला ? ओलीया पलाः पाय्छि सावित याय्गुपाखे हे देउवा नं न्ह्यज्यानाच्वंगु ला धइगु न्ह्यसः नं दनाच्वंगु दु ।
थ्व स्वयां महत्वपूर्ण खँ धइगु, संसद अधिवेशन क्वचाय्कूगु २३ न्हु दुने हे हाकनं छाय् वैठक सःते आवश्यक जुल धइगु न्ह्यसः नं दनि। थपाय्सकं छु महत्वपूर्ण विषय वल, गुकिं सरकारं हथासं क्वचाय्कूगु संसद अधिवेशन हाकनं हथासं सःतेमाल । संघीय संसदया अधिवेशन आह्वान याय्गु सरकारया थुगु पलाःयात अमेरिकी मिलेनियम च्यालेन्ज कर्पोरेसन (एमसीसी) लिसे स्वानाः स्वयाच्वंगु दु। एमसीसी सम्झौता संसद वैठकं अनुमोदन याय्गु हे नितिं सरकारं संसद अधिवेशन आह्वान याःगु चर्चा आः जुयाच्वंगु दु । छाय्कि थन नेपालय् आः एमसीसीया न्वकू फतेमा सुमार थ्यंगु दु। एमसीसी न्वकू फतेमा सुमार वइगु पक्कां जुइवं सरकार नं संसद अधिवेशन सःतेत हथाय् चाःगु खः।
एमसीसी अनुमोदन याय्त वर्तमान प्रधानमन्त्री शेरवहादुर देउवायात तःधंगु च्यूताः दु । छाय्कि एमसीसीया सम्झौता २०७४ भदौ २९ गते जूगु खः व उगु इलय् देउवां हे सरकारया नेतृत्व यानाच्वंगु ई खः । थःगु हे पालय् जूगु सम्झौता अनुमोदन याय्माःगु छगू दवाव देउवायात आः दु । उगु इलय् जूगु सम्झौता कथं सम्झौता जूगु न्यादँ दुने सम्झौता कार्यान्वयनय् वय्धुंकेमाःगु प्रावधान दु । आः सम्झौता जूगु प्यदँ बीधुंकल तर, एमसीसी संसदं अनुमोदन जुइमफुनि। थ्व अवस्था देउवायात नितिं मेगु दवाव जूगु दु । थज्याःगु अवस्थाय् एमसीसी न्वकूया नेपाल भ्रमणं देउवायात दवाव झन अप्वय्काब्यूगु अनुमान न्ह्याम्हेसिनं नं याय्फइ। थज्याःगु हे अवस्थाया दथुइ सरकारं २३ न्हु न्ह्यः तिनि क्वचाय्कूगु संसद अधिवेशन हाकनं हथासं हथासं आह्वान याःगु विश्लेषण आः यानाच्वंगु इलय् सरकारं धाःसा बजेट सम्बन्धि प्रतिस्थापन विधेयक व सदनय् थानाच्वंगु थीथी १५ अध्यादेश संसदया मू एजेण्डा जूगु दावी यानाच्वंगु दु ।
आः प्रतिनिधिसभाय् ४३ व राष्ट्रियसभाय् १२ यानाः ५५ विधेयक विचाराधिन अवस्थाय् दु । व ल्याखं संसद वैठक च्वने आवश्यक ला खः । तर सरकारं धात्थें थ्व हे विधेयकयात न्ह्यःने यंकेत हे संसद अधिवेशन आह्वान याःगु खःला धइगु आशंका नं दु । सरकार त्वःतेमाःगु व दल विभाजन सम्वन्धि अध्यादेश हयाः एमाले टुक्रा जूगु तं ला नेकपा एमाले अध्यक्ष लिसें निवर्तमान प्रधानमन्त्री केपी शर्मा ओलीयाके पक्कां दइ।
तर मेमेगु खँय् सरकारया कडा आलोचना याइम्ह ओलीं एमसीसीया खँय् धाःसा देउवाया खास हे आलोचना याःगु मदु । बरु ओली नं एमसीसीया पक्षय् दुगु खँ न्हापा ओलीं थीथी इलय् ब्यूगु अभिव्यक्तिं प्रमाणित जुइधुंकल । संसदया मेगु तःधंगु दल जनता समाजवादी पार्टी अले नकतिनि जक एमालें बायावयाः अस्तित्वय् वःगु माधव कुमार नेपाल नेतृत्वया नेकपा एकिकृत समाजवादी, जसपां बायावःगु महन्थ ठाकुर नेतृत्वया लोकतान्त्रिक समाजवादी पार्टीपाखें नं एमसीसीया विरोधय् खास हे छुं नवाःगु ताय्मदु । थ्व ल्याखं आःया संसद अधिवेशन एमसीसीया नितिं ‘काले काले मिली खाउँ भाले’ धाःथें हे जुइत्यंगु खःला धइगु विश्लेषण आपाःसिगु दु ।
