धार्मिक क्षेत्र व्यवस्थित याय्गु नामय्, सडक विस्तारया नामय् थीथी त्वहलय् नेवाःतय् छेँ थुनेधुंकल। आउटर रिंगरोड, स्मार्ट सिटी थीथी नामय् हाकनं नं छेँ थुनेगु योजना न्ह्यःने वयाच्वंगु दु । उकी ला थः दाजुकिजाया छेँ थुंलबय्् गुलिखे नेवाःतय्सं विकास खंकल । लँ तब्या जुलकि थःत हे सुविधा जुइगु ला खः नि धयाबिल । थज्याःगु हे खँ ल्हाय्गु खःसा जात्रा याइलबय् लँ जाम जुल, जुइत समस्या जुल, थ्यंकेमाःथाय् इलय् हे मथ्यंबलय् ज्या स्यन, आम्दानी हे स्यन वा पाः जुल जुइ गुलिसिया । जात्रा मयाःसा थज्याःगु अवस्था नं दइमखु। आः छु जात्रा नं मयानाछ्वय्गु ला ?

 

विकास छुकियात धाय्गु, दकले न्हापां थ्व खँय् स्पष्ट जुइमाल । तब्यागु लँ, क्रंक्रीटया ततःजाःगु छेँ, आधुनिक स्वरुप जक विकास खः ला कि विकासया अस्तित्वयात स्थानीय मनूतय् जीवनस्तरं निर्धारण याइगु खः । देशय् च्वंपिं मनूत समृद्ध जूसा देश विकास जूगु धाय्फइ । तर थन ला दुगु छेँ तकं मदय्काः च्वनेमालीगु स्थितीयात जक विकास क्यनाच्वन, खंकाच्वन।

 

धयातःगु दु, गुगु समुदाय संस्कृतिइ तःमि जुइ, उपिं गबलें नं सत्ताय् थ्यने फइमखु । नेवाःया सन्दर्भय् थ्व पाय्छि खनेदत । झी जात्रा जात्रा हालाजुया, न्याय्काजुया। अले झी अथे धाय्बलय् नेवाः समुदाय सत्ताय् थ्यनीगु ला छु खँ, झीगु सः तक नं थ्यंके फयाच्वंगु अवस्था मदु । छिपिं संस्कृतिइ तःमि धाल, मख्ख जुल, धिमय् थात । बस्, नेवाःया अवस्था थ्व हे मखुला ?

 

थ्व दक्वं खँया सार धइगु जात्रा महने, संस्कृति दक्वं त्वःताछ्वय् धइगु नं मखु । झीगु थ्व हे संस्कृति नं समृद्धिया लँपु जुइफु, जुयाच्वंगु नं दु । तर थुकिया लबः सरोकारवाला समुदायं मखु, सत्ताय् थ्यनेफुगु मेगु पुचलं जक नयाच्वन। झीगु समुदाययात, झीगु

संस्कृतियात च्वन्ह्याकेत छु याय्माः झीसं स्यू । जात्रा हनेत झीसं गुगु शक्ति क्यनाच्वना, व हे शक्तिपाखें नीति दय्केगु थासय् झी हे थ्यंकेनु, झीगु संस्कृतियात च्वन्ह्याकेत नं झीसं याय्नु।