नेपाली कांग्रेसया वंगु १४ क्वःगु महाधिवेशन अन्तर्गत महानगरपालिका अधिवेशनय् येँ महानगरपालिका समितिइ सभापतिया नितिं येँ महानगरय २५ वडाध्यक्ष निलकाजी शाक्यं उम्मेदवारी घोषणा याःगु दु।

लोकतन्त्र व विधिया शासनया पक्षय् साढे ४ दशकनिसें यात्रा अविचलित जुयाः कायम याःम्ह शाक्यं छगू विज्ञप्ति सार्वजनिक यानाः उम्मेदवारी घोषणा याःगु खः। शाक्य २०३३ सालय् विपी कोइरालां न्ह्याकूगु राष्ट्रिय मेलमिलाप नीतिपाखें कांग्रेस आवद्ध जूगु खः। नेपाल तरुण दलया केन्द्रीय दुजः जुयाः आः येँ महानगरपालिका २५ वडाया वडानायः जुयाः जनताया सेवा यानाः वयाच्वंगु दु।

असोज १६ गते शनिवाः जुइत्यंगु महानगर अधिवेशनय् क्षेत्री प्रतिनिधिपिन्सं थःगु एजेण्डा, त्याग, तपस्या व समर्पणया कदर याइगुलिं शाक्यं विश्वास काःगु दु। २०३६ सालया विद्यार्थी आन्दोलन, २०३७ सालया जनमत संग्रह, २०४२ सालया सत्याग्रहनिसें २०४६ सालया जनआन्दोलन हरेक राजनीतिक क्रान्तिया धारय् दनाः वयाच्वंम्ह शाक्य २०४३ सालय् राष्ट्रिय विद्यार्थी युनियन, पब्लिक युथ क्याम्पसय् सभापति जुयाः ज्या यायेधुंकूगु दु।

नेता शाक्य आरसीटी क्लबया फुटबल कासामि जुयाः बक्सिङ, ब्याडमिन्टन व टेबल टेनिसया कासामि नं खः। शाक्य नेपाःया पंचायतकालीन राजनीतिक सत्यता पृष्ठभूमियात कःघानाः निर्माण याःगु ‘बलिदान’ नांया संकिपाय् क्रुर दमनकारी निरंकुश अंचलाधीशया भूमिकाय् म्हितादीगु खःसा उगु हे संकिपा ‘बलिदान’या अंचलाधीश कथं नं लोकंह्वाःम्ह कलाकार खः ।

Categorized in राष्ट्रिय