सत्ता गठबन्धनया प्यंगु दलया शीर्ष नेतापिन्स मन्त्रालय भागबण्डा टुङ्गे जुइवं मन्त्रिपरिषदयात पूर्णता बिइगु तयारी दु। बालुवाटारय् म्हिगः च्वंगु गठबन्धनया बैठक थ्व स्वया न्ह्यः याउगु मन्त्रालय बाँडफाँटया हेरफेर यायेगु सहमति याउगु दु।

सहमति कथं नेपाली कांग्रेसं प्रधानमन्त्रीनाप च्यागु, माओवादी केन्द्रं न्यागु, नेकपा एकीकृत समाजवादी व जनता समाजवादीं प्यंगु प्यंगु मन्त्रालय काइगु जुगु दु। कांग्रेस, माओवादी व एकीकृत समाजवादीं छम्ह छम्ह राज्य मन्त्री कायेगु सहमति जुगु दु।

गुगु मन्त्रालय कायेगु टुङ्गे जुइवं म्हिगः मन्त्रिपरिषद् विस्तार यायेगु तयारी जुगु खःसा माधव नेपाल नेतृत्वया एकीकृत समाजवादीं मन्त्रालय भागबण्डाय् असन्तुष्टि जुइवं म्हिगः मन्त्रिपरिषद् विस्तार मजुगु खः। म्हिगः जुगु छलफल कथं एकीकृत समाजवादीयात स्वास्थ्य तथा जनसङ्ख्या, सहरी विकास, संस्कृति पर्यटन तथा नागरिक उड्डयन व श्रम तथा रोजगार मन्त्रालय बिइगु सहमति जुगु खः।

एकीकृत समाजवादीयात कानुन मन्त्रालय सता स्वास्थ्य मन्त्रालय बिइगु व प्रदेश–१ नाप वाग्मती प्रदेशया मुख्यमन्त्री बिइगु सहमति जुगु खः। भागबण्डा मिले जुइवं एकीकृत समाजवादीं मन्त्रीपिनिगु नां क्वटिइत थौं ११ बजे स्थायी कमिटी बैठक सःतूगु दु।

अथेहे, नेपाली कांग्रेसं प्रधानमन्त्रीनाप गृह, रक्षा, परराष्ट्र, सञ्चार तथा सूचना प्रविधि, कानुन न्याय तथा संसदीय मामिला, महिला बालबालिका तथा ज्येष्ठ नागरिक व युवा तथा खेलकुद मन्त्रालय काइगु जुगु दु।

माओवादी केन्द्रपाखे अर्थ, उर्जा, शिक्षा, विज्ञान तथा प्रविधि, जलस्रोत तथा सिँचाइ, भूमि व्यवस्था, सहकारी तथा गरिबी निवारण मन्त्रालय काइगु जुगु दु। अथेतु, जनता समाजवादी पार्टी न भौतिक पूर्वाधार तथा यातायात, सङ्घीय मामिला तथा सामान्य प्रशासन, कृषि तथा पशुपक्षी व वन तथा वातावरण मन्त्रालय काइगु जुगु दु। जसपां मन्त्री जुइपिनिगु नां क्वछिइ फुगु मदुनि।

Categorized in राष्ट्रिय