प्रधानमन्त्री केपी शर्मा ओलीं संस्कृतिदुने राजनीतिया मरि छुइगु प्रवृत्ति गलत जूगु खँ धयादीगु दु।

प्रधानमन्त्री निवास, बालुवाटारय् थौ सोमवाः नेपाल संवत न्हूदँ राष्ट्रिय समारोह समिति ११४५ समारोह समितिं लःल्हाःगु ध्यानाकर्षण पौ लःल्हानाकासें प्रधानमन्त्री ओलीं नेपाःया मौलिक संस्कृति व परम्परादुने राजनीति दुथ्याकाः स्यंकेगु कुतः बांमलाइगु खँ कनादिल ।

“राजनीति व अर्थतन्त्र स्यन धाःसा छुं दँ दुने ल्ह्वने फइ तर संस्कृतिइ ह्याकिं वन धाःसा उकियात ल्ह्वनेत दंदँ माली । थुखेपाखे सकलें सचेत जुइमाः।”, येँयाः थुज्वःगु पर्वय् जूगु गुलिखे भड्कावपूर्ण गतिविधिपाखे लक्षित यासें प्रधानमन्त्री ओलीं नेवाः संस्कृतिदुने आदिवासी, शास्त्रीय व अत्याधुनिक वाद्यवादन व विशेष धूनत दुगु व थुकिया संरक्षणय् जुयाच्वंगु कुतःया प्रशंसा यानादिल।

ध्यानाकर्षण पौ लःल्हायेगु झ्वलय् समितिया नायः लिसें पूर्वमन्त्री राजेन्द्र श्रेष्ठं नेपाल संवत्यात सरकारी ज्याखँय् छ्यलाबुलाय् हयेत २०८० कात्तिक २७ गतेया मन्त्रिपरिषदपाखें जूगु निर्णययात फुक्क तगिं व निकायय् कार्यान्वयन याय्त निर्देशित याय्त माग यानादिल। प्रधानमन्त्री निवास बालुवाटारय् प्रधानमन्त्री ओलीयात समारोह समितिया नायः श्रेष्ठं न्हूदँया लसताय् येँया बसन्तपुरय् कछलाथ्व पारु (कार्तिक १७ गते) शनिवाः जुइगु भिंतुना सभा ज्याझ्वलय् मूपाहाँ कथं झायेत इनाप यासें ब्वना पौ लःल्हायेगु ज्या जूगु खः।अथेहे, प्रधानमन्त्री ओलीयात नेपाल संवतयात कयाः न्हयगू बुँदे ध्यानाकर्षण पौ नं लःल्हाःगु दु।

लःल्हाःगु ध्यानाकर्षण पतिइ नेपाःया नोटय् नेपाल संवत तयेमाःगु, नेपाल संवत सरकारी दस्तावेजय् छ्यलेत याःगु निर्णय कार्यान्वयन यायेगु नितिं सरकारं परिपत्र जारी यायेमाःगु, राष्ट्रिय विभूति शंखधर साख्वाःया नामं राष्ट्रिय सिरपाः घोषणा यायेमाःगु लिसेंया खँ न्ह्यथनातःगु दु।

प्रधानमन्त्री नापलायेगु उगु ज्याझ्वलय् न्हूदँ समारोह समितिया संरक्षक हितकरवीर सिं कंसाकारं नेपाल सरकारं नेपालभाषां नेपाल टेलिभिजनय् समाचार प्रसारण व राससय् नेपालभाषां बुलेटिन प्रकाशन याःगुलिं नेपाल सरकारयात सुभाय् देछानादीगु खः।

थौ श्रेष्ठया नेतृत्वय् न्हूदँ समारोह समितिया संरक्षक नेवाः न्ह्यलुवाः मल्ल के सुन्दर, नेवाः देय् दबूया नायः पवित्र बज्राचार्य, पूर्वमन्त्री लिसें सांसद कृष्णगोपाल श्रेष्ठ, पूर्वराज्यमन्त्री दिलीप महर्जन, नेपाल संवत न्हूदँ राष्ट्रिय संरक्षण समितिया नायः प्रा.डा. नरेशमान बज्राचार्यलिसें थीथी व्यक्तिपिं उपस्थित जुयादीगु खः।अथेहे, राष्ट्रिय विभूति शंखधर प्रतिष्ठानया दुजःपिन्सं नं प्रधानमन्त्री  ओलीयात थौं सोमवाः हे नापलानादीगु दु।

Categorized in राष्ट्रिय