घोषित मितिइ हे चुनाव जुइ ः प्रधानमन्त्री ओली
पोहेलागा तृतीया ११४१, माघ १८ आइतवाः
प्रधानमन्त्री केपी शर्मा ओलीं घोषित मितिइ हे चुनाव जुइगु धका ढुक्क जुया तयारीइ न्ह्यज्यायेत ब्वनादीगु दु ।
म्हिगः चितवनया भरतपुरय् ग्वसाःग्वःगु जनसभायात सम्वोधन यासें वयेकलं छुुं मनूखं चुनाव जुइमखु धका न्यंकुगु हल्लाया लिउने मलायेत ब्वनादील । नेकपा ब्वथलेज्या मजूगु व छुं मनू जक पिहाँवंगु वयेकया जिकिर खः ।
प्रधानमन्त्री ओलीं देय् समृद्धिया यात्राय् दूगु धासें थःपिनि हे पार्टीया सरकारं याःगु विकास निर्माणया ज्याया प्रचार याये मफूगु पहःया हुनिं आःया अवस्था वःगु धयादील ।
छचाखेरं घेरावन्दी यायेगु कुतः जूगु हुनिं प्रतिनिधि सभा विघटन याना ताजा जनादेशया नितिं मध्यावधी चुनावया घोषणा जूगु वयेकया दाबी खः ।
पुष्पकमल दाहालप्रति संकेत यासें वयेकलं माडीइ वया थःपिन्सं मणि दयेकेगु उद्घोष याना चुनाव त्याकाबियागु तर ध्वगिगु आलु लाःगु धका ध्याचु नकादील ।
प्रधानमन्त्री ओलीं माडीइ अयोध्याधाम निर्माण जुया हे त्वःतिगु धका ढुक्क जुइत इनाप यानादील ।
माघ १४ गते कोरोना खोपया अभियान शुभारम्भ यासें ३ला दुने फुक्क नेपालीयात कोभिड–१९ विरुद्धया खोप बिइगु धयादीम्ह प्रधानमन्त्री ओलीं चितवनय् थ्यंका थःगु खँ हिलादीगु दु ।
भारतपाखें १०गू लख खोप अनुदानय् वयेधुंका खोप अभियान न्ह्याकुसें प्रधानमन्त्री ओलीं ३ला दुने फुक्क नेपामियात सितिकं कोरोना खोप बिइगु धयादीगु खः ।
थौं चितवनय् ग्वसाःग्वःगु आमसभास प्रधानमन्त्री ओलीं आःया ३ला दुने फ्रन्ट लाइनाय् ज्या याइपिन्त खोप बिइगु धयादील । ल्यं दूगु जनतायात छसिकथं २०२१ दुने खोप बिया कोभिड–१९ यात नेपालं लिनाछ्वयेगु प्रधानमन्त्री ओलीया धापू दु । ज्याझ्वलय् गृहमन्त्री रामबहादुर थापां पार्टीइ लिहाँवयेत मेगु पुचःयात इनाप यानादील । जनतां एकता, विकास व समृद्धि मनंतुंगु धासें वयेकलं द्वंगुयात भिंका लिहाँवयेत इनाप यानादील ।
ज्याझ्वलय् भौतिक विकास मन्त्री बसन्त नेम्वाङ व शहरी विकासमन्त्री प्रभु साहं नं सम्वोधन यानादीगु खः ।
थ्वहे दथुइ प्रधानमन्त्री ओलीं भरतपुरया निगू महत्वपूर्ण आयोजना सिटी हल व पुल्चोक–गोन्द्राङ सडक ६ गू लेन ज्याया शिलान्यास यानादील ।
थ्वयान्ह्यः प्रधानमन्त्री ओलीया विरोधय् दाहाल नेपाल पुचःलं सुथय् हे सतकय् टायर च्याका पर्चा ह्वला विरोध याःगु खः । प्रधानमन्त्री ओली हेलिकप्टरं भरतपुर विमानस्थल थ्यनेवं प्रतिगामी पलाः च्वयातःगु हाकुगु बलुन सर्गतय् ब्वयेकुगु खः । जिल्लाय् सुरक्षा व्यवस्था धाःसा कडा याःगु खः ।
