छगू जक न्यकू दुम्ह गैंडाया ल्याखाय् ज्याः थौंनिसें न्ह्यात
चिल्लाथ्व नवमी ११४१, चैत्र ९ सोमबाः
हलिमय् हे दुर्लभ नालातःगु छगू जक न्यकू दुम्ह गैंडाया ल्याखाय् ज्याः थौंनिसें न्ह्याःगु दु । गणनाया दक्व तयारी पूवनेधुंकूगु चितवन राष्ट्रिय निकुञ्जं न्ह्यथंगु दु ।
क्वछिनातःगु ईसिबें निदँ लिबाक्क न्ह्याःगु गणना चितवन व पर्सा राष्ट्रिय निकुञ्जय् छक्वलं जुइत्यंगु खः । वनमन्त्री प्रेम आले मगरं पर्सा राष्ट्रिय निकुञ्जया प्रतापपुरय् वनदेवीयात पुज्याना गैँडा गणना न्ह्याकेगु ज्याझ्व दूगु चितवन राष्ट्रिय निकुञ्जं न्ह्यथंगु दु ।
गैँडा गणना राष्ट्रिय निकुञ्ज तथा वन्यजन्तु संरक्षण विभागया नेतृत्वय् जुइत्यंगु खः । चितवन व पर्सायात छगू ब्लक दयेकूगु दु । उगु निगू निकुञ्जय् थौंनिसें व बर्दिया राष्ट्रिय निकुञ्जय् चैत १७ गतेनिसें अथेहे शुक्लाफाँटाय् चैत १९ गतेदेखि गणना न्ह्याइ ।
थ्यंमथ्यं २० दिं दुने गणना पूवंकेगु सरकारी आज्जु दु । न्यादँ÷न्यादँय् गैँडा गणना यायेगु धाःसां वंगु दँय् कोरोना व वयाँ न्ह्यः बजेट म्हो जूगु हुनिं गैँडा गणनाया ज्याः दिउगु खः । सन् २०१५ या गणनाय् नेपालय् मुक्कं ६४५ गैँडा दूगु खः । चितवन राष्ट्रिय निकुञ्जय् दक्वले अप्वः ६०५म्ह गैँडा दु ।
थ्वः आर्थिक दँय् जक चितवन निकुञ्जय् प्यम्ह गैँडा चोरी सिकारपाखें व २२म्ह प्राकृतिक कारणं गैँडा सिइधुंकूगु दु । वंगु दँय् २६ गैँडा सीगु खः ।
