मुख्यमन्त्री शेरधन राईं नं यानादिल मन्त्रिपरिषद विस्तार
लहनान्यूज | चिल्लाथ्व त्रयादशी ११४१, चैत्र १३ गते शुक्रबाः
प्रदेश १ या मुख्यमन्त्री शेरधन राईं मन्त्रिपरिषद बिस्तार यानादीगु दु । वंगु पुस १२ गते थुखे मुख्यमन्त्रलिसें प्यंगु मन्त्रालयया भालाः कुबिचनाच्वम्ह मुख्यमन्त्री राई नं प्रदेश सरकार विस्तार यानादिगु दु ।
साबिकया नेकपा विवादय् प्रचण्ड–माधव पुच त्वःता ओलीपाखे वपिं व माओवादी केन्द्र त्वःता एमाले वःपिं नेतापिन्त कःघाना मुख्यमन्त्री राईं मन्त्रिपरिषद् हेरफेर यानादिगु खः ।
नवनियुक्त मन्त्रीपिनिगु सपथ थौं हे प्रदेश प्रमुखया ज्याकुथिइ जूगु दु । माओवादी केन्द्र त्वःता एमालेय् दुहाँवम्ह टंक आङबोहाङयात आर्थिक मामिला लिसें योजना मन्त्रालयया भाला बिउगु दु ।
साबिकया नेकपाय् विवाद जुबले माधवकुमार नेपाल पुचः त्वःता ओलीपाखे झाम्ह प्रदेशसभा दुजः उषाकला राई सामाजिक विकास मन्त्रालयय भाला बिउगु दु । एमाले व साबिक नेकपाय् माधवकुमार नेपाल पुचःया शेरबहादुर तामाङ व उषाकला दम्पती आः ओली पुचलय् दि ।
अथेहे भूमि व्यवस्था कृषि तथा सहकारी राज्यमन्त्री राम रानायात नं मन्त्री दयेकूगु दु । एमालेपाखें सांसद जुयादिम्ह राना माधवकुमार नेपाल पुचःया लिकसंया जुसां नेकपा त्वादबले ओलीपाखे झाःगु खः । वय्कलं प्रचण्ड–माधव पुचलं हःगु अविश्वासया प्रस्तावय् ल्हाःचिंतकं तयादिगु खः ।
अथेहे भौतिक पूर्वाधार राज्यमन्त्री अम्बिरबाबु गुरुङयात नं मन्त्रीया भाला बिउगु दु । अविश्वासया प्रस्तावय् ल्हाचिं तया नां लितकाःम्ह उदयपुरया सांसद् कला घले व नेपाल समूह त्वःता ओलीपाखे झाम्ह मोरङया राजकुमार ओझायात राज्यमन्त्रीया भाला बिउगु दु । घलेयात कृषि व ओझायात वन लिसें वातावरण राज्यमन्त्रीया भालाः बियादिगु दु ।
Categorized in राजनीति
