उद्योगी राकेश अग्रवालयात ज्वन
पोहेलाथ्व पुन्हि ११४१, माघ १५ बिहीवाः
तु किसानया लखौंलख ध्यबा भुक्तानी मबिउम्ह चिनी उद्योग सञ्चालक राकेश अग्रवालयात ज्वंगु दु । त्रिपुरेश्वरस्थित छेँ नं हे वयेकयात ज्वंगु खः ।
वयेक विरुद्ध पश्चिम नवलपरासी व सर्लाही जिल्ला अदालतं ठगी मुद्दाय् पक्राउ पुर्जी जारी याःगु खः । राकेशया स्वामित्वय् दूगु इन्दिरा सुगर मिल नवलपरासीया प्रतापपुरय् दु ।
अन्नपूर्ण सुगर एण्ड जनरल इन्डष्ट्रिज सर्लाही जिल्लाय् दु । किसानया लखौंलख ध्यबा भुक्तानी मबिउगु द्वपनय् अन्नपूर्ण तथा इन्दिरा सुगर मिलया सञ्चालक राकेश अग्रवालयात ज्वंगु खः ।
वंगु ३० मंसिरय् तु किसानयात भुक्तानी मबिउम्ह उद्योगीयात ज्वना ध्यबा असुल यायेगु निर्णय गृह मन्त्रालयं याःगु खः । थ्वयान्ह्यः २०७५ कात्तिकय् नं वयेक तु किसानयात भुक्तानी मबिउगु द्वपनय् वयेकयात ज्वंगु खः । अग्रवालयात प्रहरीं थौं सर्लाही छ्वयेगु न्ह्यथंगु दु ।
Categorized in अपराध
