सर्वाेच्चं माओवादीयात पुनरावलोकनया अनुमति मबिल
चिल्लागा पञ्चमी ११४१, चैत्र २० गते शुक्रबाः
सर्वोच्च अदालतं नेकपा एमाले व माओवादी केन्द्र न्ह्याकेगु थःगु फैसलाया पुनरावलोकन मयायेगु निर्णय याःगु दु ।
माओवादी केन्द्रया नायः पुष्पकमल दाहालं फैसला पुनरावलोकनया नितिं बिउगु निवेदनय् म्हिगः सुनुवाई यासें प्रधानन्यायाधीश चोलेन्द्रशम्शेर जबरा व न्यायाधीशपिं तेजबहादुर केसी व प्रकाशकुमार ढुंगानाया पूर्ण इजलासं फैसला पुनरावलोकन यायेत अनुमति मबिइगु आदेश बिउगु खः ।
निवेदकं माग यायेगु अवस्था मदूगु ठहर यासें सर्वोच्चं थुकथं आदेश बिउगु खः । सर्वोच्च अदालतं वंगु फागुन २३ गते नेकपा एमाले व माओवादी केन्द्र दथुइ २०७५ साल जेठ ३ गते जूगु एकता कैफियतपूर्ण दूगु ठहर यासें निगू पार्टीयात पूर्ववत् अवस्थाय् लितछ्वयाबिउगु खः ।
निगू पार्टी एकतालिपा तःगु “नेकपा” नाँ तकं अवैध ठहर यासें उगु नाँ ऋषि कट्टेल पुचःलं हे चूलाकिगु फैसला याःगु खः । उगु फैसलां एमाले व माओवादी केन्द्र थःथःगु लँपूइ न्ह्यायेत बाध्य जक मजुल नेपाःया राजनीतिइ उथलपुथल हे हःगु दु ।
सर्वोच्चं नेकपा एमाले व माओवादी केन्द्रयात पार्टी एकता यायेगु जूसा बिस्कं हे नाँ ज्वना निर्वाचन आयोगय् वनेत आदेश बिउगु खःसा निर्वाचन आयोगं १५न्हूया ई बिया एकताया नितिं आह्वान याःगु खः । निगू पार्टी दथुइ एकता संभव मजुइगुलिं उगु फैसलाप्रति असहमति तयावःगु माओवादी केन्द्र व एमालेया माधव नेपाल पुचःलं पुनरावलोकनय् बः बिउगु खः ।
कानुन ब्यावसायीतयेलिसेया सहलहलिपा माओवादी नायः दाहाल वंगु मंगलबाः पुनरावलोकनया निवेदन ज्वना सर्वोच्च झायादीगु खः । फैसला पुनरावलोकन मयायेगु सर्वोच्चया आदेशं माओवादी केन्द्र व माधव नेपाल पुचःया थप धक्का लाःगु दु ।
