येँ महानगरपालिका ७ वडाय् लाःगु सिफल (तपाः ख्यः) ख्यलय् फुटबल ग्राउण्ड दयेकेत्यंगु खँयात कयाः स्थानीय वासिन्दां विरोध याःगु दु। न्हापा २५ रोपनी जग्गाय् न्यनाच्वंगु तपा ख्यः थौंकन्हय् अतिक्रमण जुया १४ रोपनी जग्गाय् लिकुनाच्वंगु दु। सिफल ख्यलय् छगू अभिलेख कथं उगु थाय् प्यसः दँ न्ह्यवंनिसें थीथी जात्रा पर्व यायेगु यानाच्वंगु थाय् खः।

अन लक्ष्मीनर सिं मल्ल कालीन अभिलेख नं लूगु दु। नेपाल संवत ७४५ (वि.सं. १६८१) उगु अभिलेखय् दिगु द्यः व गुथिया जग्गा धकाः स्पष्ट उल्लेख यानातःगु दु। लिसें उगु ख्यःयात ‘इन्द्रबल खेत १ कर्ष’ धकाः जग्गाया प्रकृति नं न्ह्यथनातःगु दु। येँ महानगरपालिकां टेण्डर आह्वान यानाः अन रंगशाला दयेकेत्यंगु खः।

उकियात कयाः स्थानीय जनतां विरोध यायेगुया लिसें मेयर बालेन साहं दोहोरो मापदण्ड नालाकाःगु धासें विरोध नं याःगु दु। विरोधया झ्वलय् स्थानीय वासिन्दां मेयर साहं जग्गा लित हयेगु निंतिं थीथी ज्या यानाच्वंगु खःसां नं तपा ख्यःया जग्गा धाःसा थम्हं हे अतिक्रमण यानाः अनया सांस्कृतिक क्षेत्रयात नष्ट यायेत्यंगु द्वपं बिउगु दु। महानगरं गुमे जूगु ११ रोपनी जग्गा लित हयेगु पलेसां रंगशाला दयेकाः ल्यनाच्वंगु जग्गायात नं मदयेकेगु कुतः यानाच्वंगु द्वपं नं स्थानीय वासिन्दां बिउगु दु। स्थानीय वासिन्दाया कथं सिफल ख्यलय् ग्वलया नांजाःगु जात्रा मचाती जात्रा यायेमाःगु थाय् खः।

उकथं हे बच्छलेश्वर व चाःबही गणेद्यःया खः जात्रा थीथी थासय् चाःहिकेधुंकाः सिफल ख्यलय् हयाः भण्डारखालया पखालय् ल्वाकीगु परम्परा दु। उकथं हे नंसाः भगवतीयात ग्वलय् हइगु इलय् सिफल ख्यलय् दिकाः समय्बजी नयेमाःगु परम्परा दु। लिसें सिफल ख्यलय् थीथी समुदायया दिगु द्यः नं दुसा दँय्दसं सम्बन्धित समुदाय वयाः पुजा यायेमाःगु चलन दु। चौरय् हयाः जात्रा क्वचायेकेमाः। उकथं हे ख्यलय् पुजा यायेगु, प्याखँ हुइगु दबू जक मखुसें पशुपति क्षेत्र विकासया बफर जोनलय् लाःगुलिं उगु थासय् गुगुं नं कथं हानी नोक्सानी यायेमजिउगु धासें स्थानीय जनतां तत्काल टेण्डर लित कायेमाःगु माग याना वयाच्वंगु दु।

उगु थासय् रंगशाला दयेकल धाःसा नेवाः पहिचान हे म्हासे जुइगु धासें स्थानीय जनतां विरोध यानाच्वंगु दु। स्थानीय जनतां सिफल ख्यः बचे यायेगु निंतिं वडाय् ज्ञापन पौ बीगु ज्या जुइधुंकूगु दुसा पशुपति क्षेत्र विकास कोषयात नं उगु ज्या तत्काल दिकेत माःग यानाः ज्ञापन पौ बीधुंकूगु दु।मेखे येँ महानगरापालिका ७ वडाया वडा अध्यक्ष विमलकुमार होडां धाःसां थम्हं अन फुटबल ग्राउन्ड दयेकाः जग्गाया संरक्षण यायेत्यनागु खँ धायेगु यानाच्वंगु दु । वय्कलं अन रंगशाला दयेकेधुंकाः उगु जग्गा संरक्षणया लिसें जात्रा पर्वयात नं अपुइगु दाबी यानादीगु दु।

थ्वहे झ्वलय् सिफल ख्यलय् रंगशाला दयेकेत्यंगु खँयात कयाः नेवाः देय् दबू येँ जिल्ला समितिं विरोध प्वंकूगु दु। जिल्ला समितिया अध्यक्ष धनबहादुर महर्जन तिमिलां विज्ञप्ति जारी यानाः विरोध याःगु खः। देय् दबुलिं जारी याःगु विज्ञप्तिइ नेपाल संवत ७४५ या शिलापत्र तकं दुगु तपाख्यःया संस्कृति नाप स्वापू दुगु आदिवासी नेवाःतय् प्रथाजन्य संस्था गुथिया पूर्व सूसुचित जानकारी सहित स्वतन्त्र मन्जुरी मकासें सांस्कृतिक भूमिइ ‘फुटबल रंगशाला’ दयेकेगु धकाः येँ महानगरपालिका व सम्बन्धित वडा ज्याकूया यःति कथं न्ह्यागुलिं आपत्ति नं प्वंकातःगु दु।

Categorized in राष्ट्रिय