नेपालया पप संगीत ख्यलय् वरिष्ठ गायक भीम तुलाधरया म्ये ‘दोष’ या म्यूजिक भिडियो सार्वजनिक जूगु दु ।

थौं जुममार्फत याःगु भर्च्युअल ज्याझ्वलय् नेपालया पप सम्राट धयातःम्ह वरिष्ठ गायक ओमविक्रम विष्टं म्येया उलेज्या यानादिल । ज्याझ्वलय् नेपालय् हे न्हापांगु खुसी जुममार्फत भर्च्युअल ज्याझ्वः यासें म्येया प्रिमियर जूगु दावी याःगु खः ।

म्यूजिक भिडियो गायक तुलाधरया हे युट्युब च्यानलपाखें सार्वजनिक याःगु दु ।

ज्याझ्वलय् नवासें पप सम्राट विष्टं ‘दोष’ म्येया अडियोलिसें म्यूजिक भिडियो नं तसकं बांलाक दयेकाततःगु बिचाः तसें सफलताया भिन्तुना देछानादिल ।

गायक तुलाधरं थम्हं तसकं मेहनत यानाः म्ये दयेकागु जानकारी ब्युसें आः म्येया मूल्याङ्कनया जिम्मा स्वकुमि व न्यनामियात बियागु धयादिल ।

म्यूजिक भिडियोया परिकल्पना दयेकेगुलिसें निर्देशन रवि सायमिं यानादीगु दु । भवानी शिलाकारया छायाङ्कन निर्देशनय् ड्रोन पाइलट प्रशन्न महर्जनं ड्रोन ब्वयेकादीगु दु । मोडलद्वय निरोज शाक्य व आराध्यलक्ष्मी खड्गीं अभिनय यानादीगु दु ।

२०४८ दक्कले न्हापां जिजिविषाय् पिहांवःगु थुगु म्येयात उगु इलय् भुपालमान सिंहं अरेंज यानादीगु खःसा आः भुपेन्द्र बज्राचार्यं अरेंज यानादीगु खः ।

जुममार्फत भर्च्युअल रुपं याःगु ज्याझ्वलय् गायक अले गितारिस्ट ज्योति घिमिरे, जेम्स प्रधान, संजय श्रेष्ठं म्ये उत्कृष्ट दयेकातःगु धासें सफलताया भिन्तुना देछानादिल ।

म्यूजिक भिडियो दुनेया सम्वादय् छगू इलय् हिट्स एफ.एम.या चर्चित आर.जे.पिं रबि श्रेष्ठ व रीता लिम्बुलिसें भक्तपुर एफ.एम.या आरजे प्रतिना राई व गायक जेम्स प्रधानं नं सः बियादीगु दु ।

Categorized in मनोरन्जन