अख्तियार व अदालत ब्वाँय् जुइपिन्सं ज्याय् पंगः थनाच्वन : मेयर शाक्य
लहनान्युज | चिल्लाथ्व सप्तमी ११४०
येँ महानगरपालिकाया प्रमुख विद्यासुन्दर शाक्यं महालेखा परिक्षकया विधि दुने च्वनाः ज्या याय्त थःपिन्त छुं हे समस्या मदुगु धयादीगु दु । आर्थिक दँ २०७५÷०७६या लेखापरिक्षक प्रतिवेदनया मस्यौदाय् महालेखाया प्रतिनिधिलिसे शुक्रबाः महानगरपालिकाया हे ज्याकुथिइ सहलह यासें न्हापा जूगु कमजोरीयात चीकाः न्ह्याःवनेगु व फत्तले बेरुजु क्वपालेगु वय्कलं धयादिल ।
येँ महानगरपालिका दकलय् तःधंगु अले राजधानीया महानगर जूगुलिं नं मेगु स्थानीय तहयात नं सकारात्मक हसना वनीकथं थःपिन्सं ज्या यानाच्वनागु शाक्यया धापू खः ।
व हे झ्वलय् प्रमुख शाक्यं जनतापाखें म्हयागु कर जनतायागु हे ज्याय् खर्च याय्त थःपिं नुगः मस्याय्गु प्रतिबद्धता नं प्वंकादिसें फाष्टट्रयाकं ज्या याय्त स्वःसां खरिद प्रक्रियाय् लिबाइगु व लिसें गुलिखे अवस्थाय् कर्मचारीं हे लिबाकाः नं समस्या जुइगु याःगु नं वय्कःया धापू खः ।
थःपिन्सं ज्या याय्त स्वःसां ज्याय् पंगः जुइगु÷याःगु वय्कलं लिसा कयादिल । हरिभवन दुगु थासय् महानगरपालिकाया थःगु हे भवन दय्केत, बसन्तपुरय् दमकल भवन दय्केत धकाः बजेट तकं विनियोजन याय्धुनागु अवस्थाय् छगू पुचलं अख्तियार, पुरातत्व व अदालतय् उजुरी तःजुयाः ज्याय् पंगः थंगु वय्कलं धयादिल ।
संघ, प्रदेश व स्थानीय तह दथुइ समन्वय अभावया हुनिं नं समस्या वःगु धयादिसें शाक्यं मेलम्ची खानेपानी, विद्युत प्राधिकरण, सडक विभागलिसे नं समन्वय मजूबलय् नं अर्बौया बजेट
सितिं वंगु धयादिल । थ्व दक्वं ज्याया जिम्मेवारी थःपिन्त ब्यूसा सुधार यानाः क्यनेगु दावी वय्कलं यानादिल ।
जनप्रतिनिधि जनताया ज्याय् चान्हि मधाःसे जुइमाःगु अवस्थाय् जनप्रतिनिधियात पारिश्रमिक दय्माःगु थःगु मान्यता दुगु शाक्यया धापू खः । थजाःगु विषयस अख्तियार व अदालतयात नं सकारात्मक रुपं बिचाः याय्त वय्कलं सुझाव बियादिल ।
महानगरपालिकां मुद्दती खाताय् तःगु धेबायात कयः प्रष्ट यानादिसें प्रमुख शाक्यं मालीबलय् लिकाय्ज्यूगु कथं धेबा तयातइगु व ९ दशमलब ५ प्रतिशत ब्याजं महानगरयात फाइदा हे जूगु धयादिल ।
सहलहस उपमहालेखा परिक्षक रामप्रसाद डोटेलं चैत अन्तिम तकय् प्रतिवेदन तयार याय्माःगु जूगुलिं दक्वं विभागयात छुं सुझाव दुसा याकनं बीत वय्कलं इनाप यानादिल । अथे हे, नायव महालेखा परीक्षक बामदेव शर्मा अधिकारीं विकास निर्माण, खरिद प्रक्रिया, सेवा प्रवाह व राजश्व लिसेंयात आधार दय्काः लेखापरीक्षण यानागु धयादिसें छुं सुझाव नं बियागु कनादिल ।
ज्याझ्वलय् महानगरपालिकाया थीथी विभाग व महाशाखाया प्रमुखतसें थःथःगु बिचाः तयादीगु खः । सहलहस उपप्रमुख हरिप्रभा खड्गी श्रेष्ठ, निमित्त प्रमुख प्रशासकीय अधिकृत राजेश्वर ज्ञवाली, वडाध्यक्षपिं लिसेंया उपस्थिति दुगु खः ।
