अतिक्रमित भूमि लित काय्गु नितिं अविलम्ब कुटनीतिक पहल याः
थौंकन्हय् चर्चाया विषय जुयाच्वंगु विषय खः कालापानी, लिम्पियाधुरा लागा । नेपाःया थुगु थाय्यात भारत सरकारं जारी याःगु नक्साय् दुथ्याकेवं चर्चाया विषय जूगु खःसा थुकियात कयाः आपालं राजनैतिक दललिसें जनतातसें विरोधया थीथी ज्याझ्वः याय्धुंकूगु दु । थुगु विषयया चर्चा नेपालय् जक मखु, नेपालं पिने देसय् नं उलि हे चर्चा जुयाच्वंगु दु । खय्त ला भारत सरकारं नकतिनि सार्वजनिक याःगु नक्सायात कयाः नेपाःया नापनापं जःलाखःला देय् पाकिस्तान व चीनं नं विरोध याय्धुंकूगु दु ।
स्वाभिमानी नेपाःमितसें थुगु खँयात कयाः विरोध याःगु जक मखु, थीथी कथंया ज्याझ्वः यानाः सचेत याकेगु ज्या जूगु दु । थुकिंयानाः नेपाल सरकारयात थुगु विषययात कयाः न्ववाय्त बाध्य जूगु दुसा प्रधानमन्त्री केपी शर्मा ओलीं कालापानी, लिम्पियाधुरा क्षेत्रपाखे. भारतीय सेना लित यंकेत तकं इनाप याःगु दु । तर थ्व खँ सत्य खः कि दँबदँ न्ह्यःनिसें नेपाःया थुगु लागाय् थःपिनिगु सैनिक तया वयाच्वंगु भारतं ओलीया थुगु इनापया मानय् याइ धकाः । खय्त ला थ्व खँ प्रधानमन्त्रीं नं मस्यूगु ला मखु जुइ, निश्चितरुपं वय्कलं कुटनीतिक सम्बादपाखें हे थुगु
समस्या समाधान जुइ । तर जनताया दबाबं प्रधानमन्त्री थुलि खँ न्ववाय्त नं बाध्य यानाबिल ।
लिम्पियाधुरायात कयाः जुयाच्वंगु विवाद समाधानया नितिं नेपाल सरकारं खास हे च्यूताः कयाच्वंगु दु धकाः धाय्गु थाय् धाःसा मदु । थुकिया कयाः संसदया अन्तर्राष्ट्रिय सम्बन्ध समितिं तकं लिम्पियाधुरायात दुथ्याकाः नेपाःया नक्सा सार्वजनिक याय्त सरकारयात निर्देशन बीत बाध्य जूगु दु । तर सरकारं थुकियात याउँक मानय् याइगु अवस्था धाःसा मदु । छाय्धाःसा प्रधानमन्त्री थुगु विषयस न्ववानादिसें नक्सायात भिंकाः प्रकाशित याय्गु पलेसा भारतपाखें अतिक्रमण जुयाच्वंगु भूमि लित काय्माःगु खँय् बः बियादीधुंकूगु दु । खय्त ला थ्व स्वयां न्ह्यः नं राज्य व्यवस्था
समितिपाखें लिम्पियाधुरा क्षेत्रयात दुथ्याकाः नेपाःया नक्सा सार्वजनिक याय्त सरकारयात निर्देशन बीधुंकूगु दु ।
समितिपाखें नेपाःया भूमि रक्षा व कालापानी लागाय् च्वनाच्वंपिं नेपाःमितय्त वय् वनेत अःपुइकेगु नितिं लँ व मेमेगु सुविधा उपलब्ध याकेत व भारतपाखें अतिक्रमण जुयाच्वंगु भूमिइ नेपाःया सार्वभौम अधिकार व स्वामित्व क्वातुकेत भारत सरकारलिसे राजनीतिक, कूटनीतिक तगिमय् याकनं हे वार्ता यानाः समस्या समाधान याय्त नं निर्देशन ब्यूगु दु ।
थ्व खँय् नेपाल सरकार थःम्हेस्यां च्यूताः तयाः सार्वजनिक थासय् न्ववाय्गु जक मखु, कुटनैतिक सम्बादपाखें सहलह यानाः ज्यंकेगु नितिं न्हापा हे पलाः न्ह्याकेमाःगु खः । थुकथं निर्देशनयात पियाच्वनेम्वाःगु खः ।
उकिं नेपाल सरकारया नेतृत्वकर्तापिन्सं थुकियात कयाः दुग्यंक सहलह याइ धइगु खँय् शंका हे दनि । थ्व समस्या थौंयागु जक मखु, मदुम्ह जुजु महेन्द्रया इलंनिसेंयागु खः । तर नेपाःया राजनीतिक दलं धाःसा थःत राष्ट्रभक्ति क्यनेत जक थुगु खँया चर्चा याइगु खः, तर सत्ताय् वनीबलय् थुकियात गौणरुपं काय्गु प्रबृत्ति दु । थजाःगु प्रबृत्तिं यानाः हे नेपाःया भूमि कालापानी, लिपुलेक, लिम्पियाधुरा जक मखु, सुस्ताय् अझ धाय्गु खःसा नेपाःया हरेक दिशाय् लाःगु सीमानाय् जुयाच्वंगु दु ।
नेपाःया सीमाना क्वत्यःगु खँय् सुस्तायात कयाः नं आपालं चर्चा जुइगु खः, तर सत्ताधारी दलतसें न्ह्याबलें आलटाल याना वयाच्वंगु थौंया यथार्थ खःसा थौंकन्हय् चर्चा जुयाच्वंगु सुदूर पश्चिमया लिम्पियाधुरा क्षेत्रय् नं नेपाल सरकारं कुटनीतिक पहल यानाः समस्या ज्यंकी धइगु खँय् अझ नं आशंका हे दनि ।
जुजमान महर्जन
