२०७७ माघ १३, मंगलबार

अनुगमनयात प्रभावकारी दय्केमाल

जुजुमान महर्जन
 
 
कोरोनाया भाइरस (कोभिड–१९)या महामारीपाखें जनतातय्त बचय् याय्गु नितिं थीथी सतर्कता नालेगु ज्या जुयाच्वंगु खःसां नं थौंकन्हय् कोरोनाया प्रभाव अप्वया वनाच्वंगु इलय् हे देसया अर्थतन्त्रय् लाइगु लिच्वःयात ध्यानय् तयाः थ्यंमथ्यं हरेककथं खुल्ला जुइधुंकूगु दु । 
 
सवारी साधनय् जोर विजोर लागू जुयाच्वंगु बाहेक मेगु फुक्कं खुल्ला जूगु अवस्थाय् आः कोरोना ल्वय् न्यनावनीगुली आः अझ अप्वया वनीगु जक खःला धइगु आशंका अप्वया वनाच्वंगु दु । खय्त ला सरकारं कोरोनापाखें बचय् जुइगु नितिं थीथीकथंया नियम, सूचं बीगु ज्या यानाच्वंगु दुसां तबि थुकिया प्रभावकारी धाःसां तसकं म्हो जुयाच्वंगु महसूस आम जनतां यानाच्वंगु दु ।
 
वंगु असोज १ गतेनिसें सवारी साधनय् जोर बिजोर लागू याःसां चिहाकःगु व ताःहाकःगु दूरीया फुक्क सवारी साधन चलय् जुइधुंकूगु दु । थुकियात कयाः सरकारं सवारी साधनय् स्यानिटाइजरलिसें सामाजिक, भौतिक दूरी कायम याय्माःगु नियम लागू यानाः बसया छगू लाइनय् छम्ह जक यात्रु तय्दइगु बरु न्यय्गू प्रतिशत भाडा अप्वः काय्दइगु व्यवस्था याःगु खः । सवारी साधन मदुपिं अले थःथःगु ज्याकुथी वनेमाःपिनिगु नितिं ध्यानय् तयाः लागू याःगु थुगु नियम तसकं पाय्छि खनेदुसा सवारी साधनया धनिपिन्त नं छुं भचा राहतया महसूस याःगु खः । तर आः वयाः थ्व हे कोरोना न्यंकेगु नितिं महत्वपूर्ण भूमिका जक म्हितीगु मखुला धइगु आशंका ब्वलंगु दु ।
 
 
 
सरकारं सवारी साधनय् हःगु नियम बांलाःसां नं थुकिया प्रभावकारी अनुगमन धाःसा जुयाच्वंगु मदु । विशेष यानाः सामाजिक व भौतिक दूरी कायम याय्माःगु खःसां नं सवारी चालकतसें थुगु नियमयात पालना यानाच्वंगु खनेमदु । अथे हे स्यानिटाइजरया व्यवस्था याय्माःगु नियमकथं ज्या जुयाच्वंगु मदु । थुकिं यानाः यात्रुतसें थः सुरक्षित जुइफयाच्वंगु मदु । कोरोना संक्रमणपाखें दयाच्वंगु ग्याचिकु अझ अप्वया वनाच्वंगु खनेदु ।
 
तर सरकारं धाःसा नियम दय्केगु ज्या ला यात, तर थुकिया कार्यान्वयन सुनां याय्गु खः वा सम्बन्धित निकाय छु खः ? धइगु खँ पिहाँ वयाच्वंगु दु । सवारीया भाडा धाःसा सरकारं धाःथें अझ व स्वयां अप्वः कयाच्वंगु दुसा मेमेगु नियम धाःसा पालना मजुयाच्वंगुलिं थुकियात कयाः अनुगमन याय्माःगु खः वा मखु, अन्यौल ब्वलनाच्वंगु दु ।
 
खय्त ला सरकारं हरेककथंया नियम पितबीगु तर थुकिया कार्यान्वयन मयाइगु छगू बांमलाःगु पक्ष ला दुगु हे खत । अथे खःसां नं आम जनस्वास्थ्ययात कयाः च्यूताः काय्माःगु सरकारं हलिंन्यंक हे महामारीकथं न्यनावनाच्वंगु कोरोना भाइरस संक्रमणयात कयाः खेलवाड याय्गु गुलितक पाय्छि खः ? थजाःगु खँय् विशेष ध्यानय् तयाः ज्या यासें कोरोना महामारीपाखें आम जनतायात बचय् याय्गु ज्याय् सरकारं याकनं पलाः न्ह्याकेत दबाब बीगु ज्या याय्माः । थगु खँय् सकलें उलि हे सचेत जुइमाःगु नं खनेदु ।