अन्तर्राष्ट्रिय नृत्य दिवसया लसताय् चर्यागुरुयात सम्मान
लहनान्युज | बछलागा द्धितिया ११३८ (मे २ २०१८)
अन्तर्राष्ट्रिय नृत्य दिवस अप्रिल २९ या लसताय् नृत्य निर्देशक संघ नेपाल यल कचांं चर्या गुरु पद्मराज बज्राचार्ययात (माहिला गुरुजु) सम्मानित याःगु दु ।
उगु ज्याझ्वलय् सम्मानित बज्राचार्ययात संम्मान यायेगु झ्वलय् संघया केन्द्रीय न्वकू संजय शर्मा राजोपाध्यायं ह्याउँसिन्हः तिकादिलसा केन्द्रीय नायः भुवनदास श्रेष्ठं स्वांमाः क्वखायेकादिल ।
परम्परागत व सांस्कृतिक रुपं सम्मान यायेगु झ्वलय् यल कचा नायः स्वजन रघुवंशीं बेतालिं चिकादिल । अथे हे, प्रदेश ३ यल क्षेत्र नम्बर २ पाखें प्रतिनिधि सभाय् निर्वाचित सभासद् कृष्णलाल महर्जनं दोसल्लां न्ययेकाः हनापौ लःल्हानादिल । सम्मानित जुइधुंकाः बज्राचार्यं थुगु सम्मानं थःत तःधंगु हःपाः ब्यूगु धयादिल ।
सभासद् महर्जनं आः नेपालय् नं अन्तर्राष्ट्रि नृत्य दिवसयात तःजिक हनेगु याःगुलिइ लसता प्वंकुसें थज्याःगु ज्याझ्वलं देशय् सुलाच्वंपिं प्रतिभा पिब्वयेत दबू चूलाःगु खँ तयादिल । कला व कलाकारीत क्षेत्रया विकासया लागिं थम्हं फुगु ग्वाहालि यायेगु प्रतिवद्धता नं महर्जनं प्वंकादिल । संघया केन्द्रीय न्वकूसंजय शर्मा राजोपाध्याययं नृत्ययात पाठ्यक्रमय् हे दुथ्याकाः शैक्षिक स्तरं हे थुकिया बिकास याना यंकेमाःगु बिचाः तयादिल । कलाकार देय्या तिसा मखसें राज्यया न्यागूगु अंग हे खःगु राजोपाध्यायं लिसा कयादिल ।
सभासद् महर्जनं त्वाःदेवाय् मत च्याकाः उलेज्या जूगु ज्याझ्वलय् कचाया छ्यान्जे अनुप शाक्यं लसकुस यासें कचापाखें न्हापा जूगु उद्घोषण तालीम, चर्या नृत्य कार्यशाला गोष्ठी थुज्वःगु ज्याझ्वःया बारे जानकारी बियादिल । अथे हे छ्यान्जे शाक्यं वइगु जेठया निगूगु वालय् कचा नायः स्वजन रघुबंशीया याकः सनिल व जेठया लिपांगु वालय् नेवाः ताल पद्धतिया कार्यशाला यायेगु योजना नं न्ह्यब्वयादिल ।
ज्याझ्वलय् हिपहप, जुम्बालिसेंया पाश्चात्य हुलाप्याखंया लिसें चर्या, कत्थक, कौडा, झ्याउरेलिसेंया हुलाप्याखंत नं न्ह्यब्वःगु खः ।
