अन्तर्राष्ट्रिय मैत्रीपूर्ण फुटबलय् जर्मनीया तब्यागु जित
लहनान्यूज | कछलागा त्रयादशी ११४१, जेठ २५ गते मंगलबाः
जर्मनीं अन्तर्राष्ट्रिय मैत्रीपूर्ण फुटबल कासाय् तब्यागु जित हासिल याःगु दु ।
वंगु चान्ह्य जूगु कासाय् जर्मनीं लात्भियायात ७–१ गोलं बुकुगु खः । जर्मनया जितय् थोमस मुलरं थ्यंमथ्यं निदँलिपा अन्तर्राष्ट्रिय गोल याःगु खः । युरो कपया तयारी कथं म्हितुगु कासाय् जर्मनीं तब्यागु जित पिकाःगु खः ।
न्हापांगु हाफय् छगू आत्मघाती गोजु जूगु खः । चेल्सीया फरवार्ड टिमो वार्नर व लिरो सानें निगू गोल तंसेलि जर्मनी प्रभावशाली जित हासिल यायेत ताःलागु खः । कप्तान म्यानुअल नेउर सय क्याप पूवंकूम्ह न्हापांम्ह गोलकिपर जुयादिल ।
युरोकपलिसें प्रशिक्षक जोचिम लेउं टिम त्वतेगु घोषणा तकं यायेधुंकूगु दु । वंगु बुधबाः जूगु कासाय् जर्मनीं डेनमार्कलिसे १–१ गोलया ज्वलिंज्वल कासा म्हितुगु खः । म्हिगःया कासाय् लेउं टिमय् प्यंगु ह्यूपा हःगु खः ।
जर्मनी युरो कपया कासाय् विश्व च्याम्पियन फ्रान्सलिसे म्हितिगु जुई । पुचः एफय् लाःगु जर्मनीलिसे पोर्चुगल व हंगेरी तकं लाःगु दु ।
