अन्तर्राष्ट्रिय विमानस्थलं लुँलिसें निम्हेसित ज्वन
दिल्लागा त्रयोदशी ११४१,साउन २२ शुक्रवाः
प्रहरीं त्रिभुवन अन्तर्राष्ट्रिय विमानस्थलं ४ सः व ७४गू ग्राम लुँ लिसें निम्हसित ज्वंगु दु । प्रहरीं निम्हसित लुँ लिसें ज्वंगु त्रिभुवन अन्तर्राष्ट्रिय विमानस्थल प्रहरी ज्याकुया प्रहरी वरिष्ठ उपरीक्षक राजेशनाथ बाँस्तोलां जानकारी बियादीगु दु ।
सिरहा धनगढीमाई नगरपालिका वडा ८ या रिसब महतो व खोटाङ दिक्तेल रुपाकोट मझुवागढी नगरपालिका वडा नम्बर १३ या अम्बर चाम्लिङयात ज्वनेज्या जूगु प्रहरीं न्ह्यथंगु दु । साउदीं जजिरा एयरलाइन्सया उडानं यँेँय् थ्यंकाःपिं यात्रुतयेपाखें तिसा संकलन यायेगु झ्वयलय् सुथय् ८ ता ई जुया १५ गू मिनेटय् रिसबयात ज्वंगु खः ।
साउदीं जजिरा एयरलाइन्सं वःपिं थी थी यात्रुतयेत तिसा पुने बिया भन्सार छलि याना हःगु प्रहरीं न्ह्यथना चूलायेधुंका वयेकयायात ज्वंगु खः । ज्वंपिंपाखें ८पू लुँया बाला व निपा अंगू याना मुक्ं ४सः व ७४गू ग्रामया लुँ बरामद जूगु प्रहरीं न्ह्यथंगु दु ।
त्रिभुवन विमानस्थल प्रहरी ज्याकुया कथं उगु लुँ ३७गू लख ३८द्वः ६सः व ७५ तका ज्वलिन्ज्वःया दु । वयेकयात न्यनेकने याना प्रहरीं येँया तिलगंगास्थित खोटाङ हलेसी गेष्ट हाउस सञ्चालन यानाच्वंम्ह ४१ दँया अम्बर चाम्लिङयात नं ज्वंगु खः ।
प्रहरीं म्हिगः सिनामंगलस्थित छगू होटलं छगू किलो ८सः व ६६गू ग्राम लुँ लिसें ३म्ह भारतीययात ज्वंगु खः ।
