अफगानिस्तानंं अमेरिकी सैनिक याकनं हे लिहाँ वनिगु
बछलागा पञ्चमी, ११४१, असार २५ शुक्रबाः
अमेरिकां पूर्व निर्धारित ई सीमा न्ह्यः हे अफगानिस्तानं थः सेना लितसते धुंकेगु स्पष्ट याःगु दु ।
राष्ट्रपति जो बाइडेनं थ्वयान्ह्यः सेप्टेम्बर ११ न्ह्यः सेना लितसतेगु न्ह्यथंसा नं अगष्टय् हे अमेरिकी सेना स्वदेश लिहाँवयेधुंकिगु स्पष्ट यानादीगु खः । अफगानिस्तानया थी थी शहरय् तालिवानी लडाकूतये ज्यापहः सक्रिय जूगु इलय् राष्ट्रपति बाइडेनया थुकथंया प्रतिक्रिया वःगु खः ।
सन् २००१ सेप्टेम्बर ११य् थःगु देशय् आतंकवादी हतः जुइधुंका अमेरिकां २० दँ अफगानिस्तानय् विद्रोहीलिसे ल्वागु खः । थ्वयान्ह्यः पूर्व राष्ट्रपति डोनाल्ड ट्रम्पं नं अमेरिकी सेना लितसतेगु मिति क्वजिउगु जूसा नं बाइडेनं पूर्व निर्धारित मिति थुखेउखे यानादीगु खः ।
अमेरिकां तालिवानीविरुद्धया कारवाही क्वचागु घोषण याःसा नं अफगानिस्तानय् कुटनीतिक नियोग व विमानस्थलया सुरक्षाया नितिं धाःसा ५सः निसें द्वःछिम्ह सेनायात निरन्तरता बिइगु धाःगु दु । लिपांगु ई जूगु छगू सर्वेक्षणय् अमेरिकी सेनायात अफगानिस्तानं लितहयेगुलिइ तच्वकं समर्थन वःगु धाःगु दु ।
थुखे अमेरिकी सेनायात लितयंकेगु प्रक्रिया न्ह्यागु लिसें अफगानिस्तानय् तालिवानीया ज्यापहः तच्वःगु लिसें सर्वसाधारण त्रसित जूगु दु । थी थी दुर्गम क्षेत्रय् मस्त ब्वनेकु वनेगु, सार्वर्जनिक थासय् सर्वसाधारणं वयेवनेगु बन्द याःगु बुखँय् न्ह्यथनातःगु दु ।
Categorized in अन्तर्राष्ट्रिय
