अफगानिस्तानया मेगु प्रमुख शहर मजार–ए–शरीफ नं कजय् काल
गुंलाथ्व सप्तमी ११४१,साउन ३१ आईतवाः
तालिवानी लडाकूतय्सं अफगानिस्तानया मेगु प्रमुख शहर मजार–ए–शरीफ नियन्त्रणय् काःग दु ।
लिपांगु लच्छि दुने हिंसात्मक ज्याखँ तच्वयेकूगु तालिवानी पुचलं अफगानिस्तानया थीथी शहर थःगु नियन्त्रणय् कयाच्वंगु दु । अमेरिकाया नेतृत्वय् दुगु विदेशी सेना लिहांवंगु लिसें तालिवानीं थःगु सशस्त्र संघर्ष तच्वयेकूगु खः ।
व झ्वलय् तालिवानी पुचलं देय्या मुख्य शहर थःगु नियन्त्रणय् कयाच्वंगु दु । राष्ट्रपति अशरफ घानीं सरकारी सेनां तालिवानी विद्रोही विरुद्धया कारवाहीयात तच्वयेकागु न्ह्यथंसां उगु पुचलं थःगु ज्याखँ झन अप्वयेकूगु खः ।
विद्रोहीं राजधानी काबुलबाहेकया मुख्य शहर नियन्त्रणय् कायेधुंकूगु दु । लिपांगु निगू दशकनिसें न्ह्यानाच्वंगु हिंसाया हुनिं अफगानिस्तानय् लखौं मनूत सीगुलिसें व स्वयां अप्वः विस्थापित जूगु दु ।
तालिवानीतय् हिंसात्मक ज्याखँ नियन्त्रणय् मवःबलय् थीथी राष्ट्रं कुटनीतिक निकायलय् दुपिं थः नागरिकयात लित सःतूगु दु ।
Categorized in अन्तर्राष्ट्रिय
