अफगानिस्तानया विमानस्थलय् रकेट हमला
दिल्लागा नवमी ११४१, साउन १८ मंगलबाः
अफगानिस्तानया कान्दाहार बिमानस्थलय् रकेट हमला जूगु दु ।
बिमानस्थलयात लक्षित यानाः रकेट हमला जूगुलिसे फुक्क उडान रद्द याःगु दु । तालीवानी बिद्रोहीतय्सं हमला याःगु अफगान सेनां द्वपं ब्यूगु दु । अफगान सेनां ब्यूगु जानकारी कथं स्वंगः रकेट कान्दाहार बिमानस्थलया धावणमार्ग तक वःगु दु ।
रकेट हमला जुइवं सुरक्षाया दृष्टिकोणं उडानत रद्द याःगुलिं सलंसः यात्रु अलपत्रय् लाःगु दु । अफगानिस्तानया स्वंगू मूमू शहर हेरात, लश्कर गाह व कान्दहार कब्जा यायेगु झ्वलय् इपिं शहरय् तालीवानी बिद्रोहीत दुहाँवःगु धागु दु ।
तालीवानीत कादान्हार वःगुलिसे अफगान सेनादथुइ ल्वापू जुयाच्वंगु दु । लिपांगु ईलय् विमानस्थल कब्जा यायेत इमिसं रकेट हमला याःगु अफगान सरकारं धागु दु । अफगानिस्तानया मू शहर धयाःतःगु कान्दाहारय् तालीवानी बिद्रोहीतय्सं स्ववाः थुखय्निसें थीथी कथं हमला यानाच्वंगु दु ।
अफगाानिस्तानं अमेरिकी सेना लित सःतेवं अफगानिस्तानय् तालीवानी ज्यापहः तच्वःगु खनेदु । लिपांगु ईलय् तालीवानीतय्सं हमला यानाच्वंगुलिं सलंसः मनूत थःथःगु थाय् त्वःताः पलायन जुइत बाध्य जूगु दु ।
Categorized in अन्तर्राष्ट्रिय
