अफगानिस्तानय् तालीवानया आक्रमण न्ह्यानाच्वन
दिल्लागा अष्टमी ११४१,साउन १७ सोमवाः
अफगानिस्तानया दक्षिण व पश्चिमी क्षेत्रया मू ३ शहर तालिवानं थःगु कब्जाय् कायेगु कुतः याःगु दु ।
लिपांगु इलय् हिंसात्मक ज्याखँयात तच्वयेकूगु तालीवान बिद्रोहीं मू शहर थःगु कब्जाय् कायेत स्वःबलय् सरकारी सेना व तालिबान दथुइ लडाई जूगु धाःगु दु । अफगानिस्तानया लश्कर गाह, हेरात, कान्दर गाह कब्जा यायेत स्वःगु तालवानी बिद्रोही व सैनीक दथुइ तच्वःगु संघर्ष जूगु खः ।
वइगु सेप्टेम्बर तक्कय् अफगानिस्तानं बिदेशी सेना लिहांवनीगु घोषणा अफगान सरकारं यायेधुंकाः तालीवानी बिद्रोहीं हिंसात्मक ज्याखँयात तच्वयेकूगु दु । थ्वयां न्ह्यः उमिसं इरान व पाकिस्तानलिसे स्वाःगु सीमालिसें अफगानिस्तानया अप्वः थे क्षेत्रत कब्जाय् कायेधुंकूगु दु ।
तालीवानी बिद्रोहीं बेलायती सेना दुगु हेलमन्द प्रान्तय् नं हताः याःगु दु । तालिवानया हताः धुंकाः उगु क्षेत्रया स्थानीय पलायन जुयाच्वंगु दु । सरकारी सेना व तालीवानी दथुइया लिपांगु संघर्षय् सलंसःया ज्यान वनेधुंकूगु दु ।
Categorized in अन्तर्राष्ट्रिय
