अफगानिस्तानय् राष्ट्रपति ज्याकु नियन्त्रणय् कायेधुंका तालिबानं देशय् युद्ध क्वचागु घोषणा
लहनान्यूज | गुंलाथ्व अष्टमी ११४१, साउन ३२ सोमबाः
अफगानिस्तानय् राष्ट्रपति ज्याकु नियन्त्रणय् कायेधुंका तालिबानं देशय् युद्ध क्वचागु घोषणा याःगु दु ।
प्रान्तीय राजधानी नियन्त्रणय् कया आइतबाः चान्हय् राष्ट्रपनि भवन दुहाँवंगु तालिवान नेतातयेसं थःपिन्सं युद्ध त्याकागु व आः अफगानिस्तानय् युद्ध क्वचागु घोषणा याःगु खः । अल जजिरा टेलिभिजनलिसे खँ ल्हासे अफगानिस्तान जनताया मुक्ति आन्दोलन सुथांलाःगु व थःपिन्सं मनंतुनाग ुजीत चूलागु तालिवान नेतां धाःगु खः ।
विदेशी शक्तितयेत अफगानिस्तानय् हाकनं हस्तक्षेप याना असफल जुइगु कुतः मयायेत नं ख्याच्वः बिउगु दु । तालिबान लडाकु काबुल थ्यंगुलिसें राष्ट्रपति अशरफ घानीं आइतबाः न्हिने देय् त्वःतूगु खः । घानी काजकिस्तान वंगु धाःसा नं वयेक उज्वेकिस्तान थ्यंगु धलः अन्तर्राष्ट्रिय सञ्चार माध्यमतयेसं बिउगु दु ।
थ्वहे दथुइ, राजधानी काबुलय् तालिबानया पूर्ण पकड जुइधुंका अमेरिकां काबुल अन्तर्राष्ट्रिय विमानस्थल परिसरं थःगु अस्थायी दूतवास न्ह्याकुगु दु ।
दूतावासया कर्मचारीयात हेलिकप्टरं विमानस्थल थ्यंका अनं हे अमेरिकी ध्वाँय् तया ज्या न्ह्याकुगु न्ह्यथंगु दु । द्वःछि मल्याक अमेरिकी सेना विमानस्थलय् हे दूगुलिं काबुल विमानस्थल अझं नं अमेरिकाया नियन्त्रणय् हे दूगु अनुमान याःगु दु ।
उखे, अमेरिकाया पूर्व राष्ट्रपति डोनल्ड ट्रम्पं अफगानिस्तान मामिलाय् सुथांमलाःगु धका राष्ट्रपति जो बाइडेनया राजीनामा प््mवंगु दु । अमेरिकी सेनाया बहिर्गमनय् वुद्धि छ्यला ज्या मजूबलय् अफगानिस्तान अस्तव्यस्त जूगु धका ट्रम्पं अफगानिस्तानय् सुयात वयेकलं अनुमति बिल, उगुया नितिं वयेकलं राजीनामा बिइमाःु धका धाःगु दु ।
बाइडेन प्रशासनं धाःसा तालिबानलिसे ट्रम्पं याःगु सम्झौता कथं अमेरिकी सेना अनपाखें लिहाँवःगु लिसः बिउगु दु । सामरिक मामिला विज्ञतयेसं नं अफगानिस्तानया अराजकताया नितिं बाइडेन हे जिम्मेवार जूगु धका कुँख्यंगु दु ।
Categorized in अन्तर्राष्ट्रिय
