अफ्रिकी देय् मादागास्करय् तच्वकं वःगु वाः व धाकु फयेया हुनिं द्वलंद्वःम्ह नागरिक प्रभावित जूगु दु ।

प्रतिघौ  २सः व ५०गू किलोमिटरया दरं वःगु ‘बातसिराई’ नाँया धाकुफसं द्वलंद्वःम्हसित विस्थापित याःगु दु । धाकु फसं द्वलंद्वः छेँया पौ पुइकुगु लिसें थाय् थासय् मतया पोल व सिमा क्वथःगुलिं अनया जनजीवन ठप्प जूगु दु ।

समुद्रय् १५गू मिटर तःजाःगु छाल वयेफइगु आँकलन याःगु दु । मदागास्करय् निवाया ई दुने वःगु थुगु निगूगु शक्तिशाली धाकु फये खः । अफ्रिकाया दक्षिणी लागाया हिन्द महासागरय् दूगु टापु देय् मदागास्करय् निवा न्ह्यःया धाकुफसय् लाना ५५म्ह सीगु खः ।

थ्वहे दथुइ संयुक्त राष्ट्रसंघया बिश्व खाद्य ज्याझ्वलं मदागास्करया जनताया नितिं खाद्यान्नया व्यवस्था यायेत लिसें उद्धारया नितिं विमानत तयारी अवस्थाय् तःगु दु ।

तच्वकं वाः वयाच्वंगुलिं धाकु फये अझं छुं दिं कायम जुइगु धका मौसमबिदतयेसं मदागास्करय् थप क्षति जुइगु ताकं याःगु दु ।

Categorized in अन्तर्राष्ट्रिय