अमेरिकां अलकायदाया वरिष्ठ नेता स्यानागु दावी
कौलागा तृतीया ११४१, कात्तिक ६ शनिबाः
अमेरिकां अलकायदाया वरिष्ठ नेता स्यानागु दावी याःगु दु । सिरियाय् ड्रोन हताःलं अलकायदाया वरिष्ठ नेता अब्दुल हमिद अल मतार सीगु अमेरिकी सेनां न्ह्यथंगु दु ।
अमेरिकी सेनाया केन्द्रीय कमाण्डया प्रवक्ता मेजर जोर रिग्स्बीं हमिद सीगु पुष्टि यानादील । अमेरिकी सेनां दक्षिणी सिरियाय् दूगु थःपिनि चौकीइ हताः जूगु निन्हु लिपा याःगु कारवाहीलय् हमिद सीगु धाःगु दु ।
अमेरिकी सेनां अलकायदालिसे बदला कायेत हमिदयात स्यानागु दाबी नं याःगु दु । सेप्टेम्बरनिसें अमेरिकी सेनां पश्चिमी सिरियाया विद्रोही नियन्त्रित क्षेत्रय् थःगु कारवाहीयात तच्वयेकागु न्ह्यथंगु दु ।
उगु क्षेत्रय् न्ह्यागु कारवाहीलय् अलकायदाया मेम्ह नेता सलीम अबु अहमद नं सिइधुंकुगु दु । थ्वयान्ह्यः न्ह्यागु हवाई कारवाहीलय् तःधंगु ल्याःखय् विद्रोहीत सीगु अमेरिकी सेनां दाबी याःसा नं उकिया स्वतन्त्र रुपय् पुष्टि जुइ मफूगु अन्तर्राष्ट्रिय समाचार संस्थातयेसं न्ह्यथंगु दु ।
Categorized in अन्तर्राष्ट्रिय
