अमेरिकाया अफगानिस्तान मिसन क्वचाल
गुंलागा नवमी ११४१, भाद्र १५ मंगलवा
अन्ततः अमेरिका २० दँ लिपा अफगानिस्तानं पिहांवंगु दु । वंगु चान्हय् काबुल विमानस्थलं अमेरिकी सेनाया लिपांगु विमान ब्वयेधुंकाः २० दँ न्ह्यःनिसेंया अमेरिकी मिसन क्वचाःगु खः ।
तालीवानया ल्हातया् सत्ता वनेधुंकाः वं ब्यूगु अगष्ट ३१ या ई सीमा दुने हे अमेरिका अनं पिहांवंगु खः । अमेरिकी सेना लिहां वनेधुंकाः तालीवानं हवाई फायर यानाः लसता हंगु दु । अमेरिकां तालीवानं ब्यूगु ई सीमा दुने हे उद्धारया मिसन पूवंकागु धाःगु दुसा तालिवानं काबुल विमानस्थलयात नं नियन्त्रणय् काःगु दु ।
थ्व हे दथुइ, अमेरिकी राष्ट्रपति जो बाइडेनं थः सैनिकतय्त सुभाय् बियादीगु दु । संयुक्त राष्ट्र सुरक्षा परिषदय् अफगानिस्तानबारे नवासें वय्कलं ग्यानापूगु परिस्थितिइ नं अमेरिकी सेनां साहस व उदारता क्यंगु धासें च्वछानादिल ।
अमेरिकाया अफगानिस्तान मिसन अमेरिकी सेनाया उदारताया हुनिं सुथां लाःगु बाइडेनया धापू खः । अफगानिस्तान तालिवानया कब्जाय् वनेधुंकाः अमेरिकां अनं १ लख २०द्वः अमेरिकी नागरिक, ग्वाहालिमि व अफगानी नागरिकलिसें मेपिं ग्वहालिमितय्त उद्धार यानागु अमेरिकी रक्षा मन्त्रालयं न्ह्यथंगु दु । अमेरिकी रक्षा मन्त्रालय पेन्टागनया कथं अफगानिस्तानय् अझं नं सलंसः नागरिक उद्धारया नितिं पियाच्वंगु दनिसां उद्धार यायेमफुनि ।
थ्व हे दथुइ, पाकिस्तानय् सुलावःम्ह अलकायदा प्रमुख २० दँ लिपा अफगानिस्तान लिहांवंगु दु । अमेरिकी सेना अफगानिस्तानं लिहां वनाकथं अलकायदा प्रमुख अले प्रभावशाली नेता अमीन उल हक अफगानिस्तान लिहांवंगु खः ।
अमेरिकी सेनाया तैनाथी लिपा पाकिस्तान थ्यंम्ह वय्कः ओसामा बिन लादेनया बिश्वाश पात्रलिसें ग्वहालिमि खः । ओसामा बिन लादेन मदय्धुंकाः अलकायदाया कमाण्ड कःघाःम्ह अमीन उल हक अफगानिस्तानया थःगु गृह जिल्ला नांगहार लिहांवःबलय् वय्कःया सलंसः समर्थकतया्सं स्वांमाः क्वखायेकाः लसकुस याःगु खः ।
अमेरिकां सन् २००१य् जारी याःगु आतंकबादीया धलखय् अमीनया नाम नं दुथ्याः । अमीन अफगानिस्तान लिहां वयेधुंकाः अन अलकायदाया पकड बल्लायेफुगु धुकुमां याःगु दु । तालीवानया ल्हातय् सत्ता वंगु अफगानिस्तानय् अलकायदाया प्रमुख नं थ्यंगुलिं थुगु निगू पुचःया गठबन्धनं आतंकबाद झन अप्वइगु आशंका नं याःगु दु ।
Categorized in अन्तर्राष्ट्रिय
