अमेरिकाया राजधानी वासिङ्गटन डिसी डुबानय्
लहना न्यूज | ने.सं.११३९ दिल्लाथ्व सप्तमि (९ जुलाइ २०१९), मंगलवाः
अमेरिकाया राजधानी वासिङ्गटन डिसी तसकं वा वयाः खुसिबाः वःगुलिं डुबानय् लाःगु दु ।
वंगु चान्हय् वःगु खुसिबाःया हुनिं वासिङ्गटन डिसिया ह्वाइट हाउसलिसें थीथी क्षेत्रय् तकं लिच्वः लाःगु दु । अथे खःसां ह्वाइट हाउसय् दुगु ऐतिहासिक अभिलेख, दस्तावेज, घोषणा पौ, संविधान थेंजाःगु महत्वपूर्ण दस्तावेज सुरक्षित जूगु अधिकारीतसें न्ह्यथंगु दु । ह्वाइट हाउसया वेष्ट विङ्गया बेसमेन्टय् लः दुहांवंगु नं न्ह्यथंगु दु ।
अथे हे, शहरया थीथी क्षेत्रय् लः दुहांवंगुलिं लँ अवरुद्ध जुयाः गुलिखय् यात्रुत अन हे लानाच्वंगु दु । लँ अवरुद्ध जुइवं उपिं थःपिनिगु सवारी साधन त्वःताः वनेत बाध्य जूगु खः व गुलिखे मनूतय्त उद्धार तकं यायेमाःगु एजेन्सीं न्ह्यथंगु दु । थ्व हे झ्वलय् लःया सतह खुगू न्हय्गू फिट च्वय् थाहां वःगु नं एजेन्सीं धाःगु दु ।
अथे हे, अण्डरपासय् धाःसा २००गू मिटरतक लः दुगु खः । भूमिगत रेलमार्ग नं डुबानय् लाःगु खः ।
शहरय् छक्वलं खुसिबाः वयेधुंकाः नेशनल वेदर सर्भिसं तसकं खुसिबाः वयेफइगु अनुमान याःगु दु । खुसि दुहां वःगुलिं उगु लागाय् सर्वसाधारणपिन्त वयेवने तकं मयायेत इनाप याःगु दु ।
Categorized in अन्तर्राष्ट्रिय
