अमेरिकाय् छवाःया दुने १० हजारं अप्वो मनू सीत
लहानान्युज | कछलागा द्धितिया ११४१, मंसिर १७ बुधवाः
कोरोनाभाइरस महामारीपाखे दकलय् अप्वो प्रभाविथ संयुक्तराज्य अमेरिकाय् छवाःया दुने कोरोना संक्रमणपाखे १० हजार मनू सी धुकुगु दु।
जोन्स हप्किन्स विश्वविद्यालयया कथं आःतक अमेरिकाय् कोरोना भाइरस संक्रमणया कारण सीपि २ लाख ७७ हजार स्वया अप्वो जुइ धुकुगु दु। थौं कन्ह्य अमेरिकाय् थीथी राज्य नाप शहरय् कोरोना भाइरस संक्रमण फैलै जुया वयाच्वंगु दु।
अमेरिकाय् कोरोना संक्रमितपि १ करोड ४१ लाख थ्यने धुकुगु दु सा उकि मध्ये ८३ लाख ३३ हजार मनू संक्रमणमुक्त जुइ धुकुगु दु। विश्वयकं कोरोना संक्रमणपाखे १४ लाख ८६ हजार ८०० स्वया अप्वो मनू सी धुकुगु दु।
विश्वविद्यालयया कथं विश्वयकं ६ करोड ४१ लाख ९४ हजार स्वया अप्वो मनूतय्त संक्रमित जुइ धुकुगु दु सा ४ करोड ४४ लाख ४२ हजार मनूत संक्रमणमुक्त जुइ धुकुगु दु। आः न विश्वयकं १ लाख ६ हजार मनूत गम्भीर स्वास्थ्य समस्याय् दु।
Categorized in अन्तर्राष्ट्रिय
