अमेरिकाय् धाकुफसं सीपिनि ल्याः ८४म्ह थ्यंगु दु । आपाल मनूत तनाच्वंगुलिं म्होतिइ सच्छि सिवें अप्वःसिया ज्यान वने फइगु ताकं याःगु दु ।

धाकु फसं लिच्वः लाःगु ६ गू वटा राज्य मध्ये केन्टुकीइ आपत्कालिन अवस्था लागू याःगु दु । केन्टुकीइ जक  धाकु फसय् लाना ७०म्ह सिइधुंकुगु दु । केन्टुकीया आपालं कार्खानाय् कामदारत तक्यंगु ताकं याःगु दु ।

दक्वःलय् अप्वः हताहती धाःसा मेफिल्डया ज्याझ्वलय् जूगु अनया गभर्नर एण्डी बेसियरं जानकारी बियादीगु दु । धाकुफसं सडक व रेलमार्ग क्षत विक्षत दय्कुगु दुसा द्वलंद्वः सवारी साधन क्षतविक्षत जूगु दु ।

गुलिखय् सवारी साधनय् मनूत तक्यंगृु अनुमानय् मालेज्या जुयाच्वंगु दु । आपालं मनूत मत व त्वनेगु लःया सुविधां बञ्चित जूगु दु । इलिनोइस राज्यय् दूगु अमेजनया गोदामघर दुंबलय् आपालं मनूत तक्यंगु दु ।

केन्टुकीलिपा मिसीसिपी, इलिनोइस, अर्कान्सस, मिसुरी व टिनेसी राज्यय् धाकु फयेया लिच्वः लाःगु दु । केन्टुकीइ आपत्कालिन अवस्था लागू यायेगु आदेश जारी याना अमेरिकी राष्ट्रपति जो बाइडेनं धाकु फसं लिच्वः लाःपिं जनताया नितिं संघीय कोषं गुलि फू ग्वहालि चूलाकेगु धयादीगु दु ।

थुगु धाकु फसं अमेरिकी इतिहासय् हे दक्वःलय् ग्यानापूगु जूगु धका बाइडेनं धाकु फसं लिच्वः लाःपिनि नितिं आर्थिक ग्वहालि यायेगु वचं बियादीगु खः । धाकुफसं अमेरिकाया मेगु राज्य् नं विनाश याये फइगु मौसमबिद्तये ख्याच्वः दु ।

Categorized in अन्तर्राष्ट्रिय